Soltüstık Казахстан
Ұлттық банк 24 қараша күні базалық ставканы 15,75 пайыз деңгейінде бекітті. Еліміздегі ең басты қаржы ұйымы биыл базалық ставканы қатарынан үшінші рет төмендетіп отыр. Алғаш рет биыл тамызда 16,75-тен 16,50 пайызға түскен болатын.
Ұлттық банк төрағасы Тимур Сүлейменовтің айтуынша, бұл ретте назар аудармаса болмайтын жекелеген тәуекелдер жоқ емес. Олар – азық-түлік бағасының өсуі, негізгі сауда-серіктесіміз – Ресейдегі инфляция, өз ішіміздегі инфляциялық күтулердің динамикасы және бюджеттік шығындар.
Сыртқы секторда инфляциялық қысымның төмендегені байқалып отыр. Бұл қатаң монетарлық саясаттың әсерін, азық-түлік бағасының оң динамикасын және энергия бағасының қысқа мерзімге баяулағанын білдіреді. Соған қарамастан, қысқамерзімді келешекте проинфляциялық факторлардың ықпалы біршама күшейеді деп күтеміз”, – дейді Тимур Сүлейменов.
Оның айтуынша, биыл базалық сценарийде инфляция 9,3-10,3 пайыз шегінде болжанып отыр. Болжамды осы жылға қайта қарау тұрғын үй-коммуналдық қызметтер тарифінің және азық-түлікке жатпайтын тауарлар бағасының бірқалыпты өсуіне байланысты. Ортамерзімді келешекте сыртқы орта қысымының әлсіреуі және монетарлық саясаттың ұстамды қатаң сипаты инфляцияның төмендеуіне ықпал етеді. Алдағы жылдарға болжам мынадай: 2024 жылы инфляция 7,5-9,5 пайыз деңгейінде, 2025 жылы 5,5-7,5 пайыз деңгейінде сақталады.
2024 жылы инфляция одан әрі баяуласа, Ұлттық банк инфляцияны тұрақтандыру үшін ортамерзімді келешекте ұстамды қатаң ақша-кредит шарттарын сақтап, мөлшерлемені бірқалыпты төмендетуді қайта қарастырмақ. Бұл ретте деректерді жинақтау және тәуекелдер балансын бақылау үшін базалық мөлшерлемені өзгертуде кідіріс болуы да мүмкін.
Әсет ҚАНАФИН.