Soltüstık Казахстан
Елордада Президент Қасым-Жомарт Тоқаевтың қатысуымен “Алтын сапа” және “Парыз” сыйлықтарын табыстау рәсімі өтті. Марапатталғандардың қатарында солтүстікқазақстандық кәсіпорындар да бар.
Бизнестің әлеуметтік жауапкершілігін анықтайтын “Парыз” байқауында Мамлют ауданына қарасты “Новомихайловское – 2003” жауапкершілігі шектеулі серіктестігі лауреат атанды. Бұл байқауға қатысуға 492 ұйымнан өтінім түссе, соның 161-і – ірі кәсіпкерлік субъектісі, 331-і – шағын және орта бизнес өкілдері.
“Новомихайловское – 2003” серіктестігі шағын және орта кәсіпкерлік субъектісі ретінде “Үздік ұжымдық шарт” аталымы бойынша күміс жүлдегер атанды. Аталмыш кәсіпорын – өңірдегі озық шаруашылықтардың бірі. Дәнді және майлы дақылдар өсіріп, мал шаруашылығын дамытуда. Сондай-ақ бұл мекеме әлеуметтік саланы ұмыт қалдырмай, ауылдағы ағайынға жайлы жағдай жасауда. Осы істері Президент және Үкімет тарапынан жоғары бағаланғанын атап өткен жөн.
– Біздің мақсатымыз – ауылды көркейту. Бұл бағытта ауқымды жұмыстар атқардық. Қызметкерлерімізге жеті үй салып, заманауи спорттық-сауықтыру кешенін тұрғыздық. Алда әлі талай әлеуметтік нысан салу жоспарда бар. Жас мамандарға 1 млн. теңге көлемінде көтермеақы төлейміз. Бұл үлкен қолдау болып отыр, – дейді “Новомихайловское – 2003” жауапкершілігі шектеулі серіктестігінің бас директоры Геннадий Щеголев.
Биыл “Алтын сапа” байқауына қатысуға 221 отандық компания өтінім берді. Байқауда петропавлдық “SMBGROUP Family” жауапкершілігі шектеулі серіктестігінің жұмысы жоғары бағаланып, кәсіпорынға “Іскер” арнайы сыйлығы табысталды. Қараша айында “Қазақстанның үздік тауары” көрме-байқауының өңірлік кезеңінде 9 жеңімпаз компания анықталса, жетеуі Астанадағы республикалық кезеңде өңіріміздің намысын қорғады. Олардың бірі – “SMBGROUP Family” жауапкершілігі шектеулі серіктестігі. Өндіріс ошағы 2020 жылдан бері “big bag” және “sling bag” қапшықтарын өндіреді. Аталған кәсіпорын бұл байқауға алғаш рет қатысып, “Алтын сапа” және “Қазақстанның үздік тауары” көрмелерінде өз тауарын таныстырды.
Осыдан үш жыл бұрын “SMBGROUP Family” серіктестігі үдемелі индустриялық-инновациялық даму бағдарламасына және индустрияландыру картасына енгізілді. Қазіргі таңда компанияда 234 адам жұмыс істейді.
– Бізді еліміздің тау-кен өндіру саласындағы үздік компаниялары мойындады. “Іскер” сыйлығы жұмысымызға берілген жоғары баға деп есептеймін. Біз тапсырыс берушінің талғамына сай қапшықтар өндіреміз. Ол түрлі жүктерді тасымалдауға және сақтау үшін пайдаланылады. Қапшықтар 3,5 тонна жүкті көтере алады. Өнімді ішкі нарықта да, көрші елдерге де саудалап жатырмыз. Тауарымыздың 40 пайызы экспортқа шығарылады, – дейді “SMBGROUP Family” жауапкершілігі шектеулі серіктестігінің директоры Мұқан Сәдуов. Қазіргі уақытта кәсіпорын зауыттың өндірістік қуатын арттыруды көздеп отыр. Бұл мақсатқа жету үшін жаңа заманауи құрал-жабдықтар орнатпақ.
Аманжол НҰРТАЗИН,
“Soltüstık Qazaqstan”.