Soltüstık Казахстан
Петропавлдағы Орталық алаңда облыс әкімі Ғауез Нұрмұхамбетовтің қатысуымен жаңа жылдық бас шыршаның шамын жағу салтанаты өтті. Мерекелік кеш Аяз аталар мен Ақшақарлардың шеруімен басталып, олар жиналған жұртшылыққа көтеріңкі көңіл күй сыйлады. Тұрғындар жергілікті өнерпаздар әзірлеген мерекелік концертті ерекше ықыласпен тамашалады.
– Санаулы күндерден кейін біз жаңа 2024 жылға қадам басамыз. Өтіп бара жатқан жыл еліміз үшін игі жақсылықтарға толы болды. Келер жылдың да қуаныш пен береке алып келетініне сенеміз. Біз әзірлеген мерекелік бағдарлама қалалықтар мен меймандардың көңілінен шығуда. Осындай шараларды алдағы күндері де өткізетін боламыз, – дейді қалалық Мәдениет үйінің өнерпазы Ерден Қожахметов.
Шыршаның шамын жағу үшін арнайы “қонаққа” келген ақ аюлар кештің шырайын кіргізе түсті. Нағыз ертегілер еліне саяхаттап, таңғажайып әлемде жүргендей әсер алған халық “көңіліміздің керегесін кеңейтіп, баршамызға береке сыйлаған жылдың он екі айына алғысымызды білдіреміз!” – деп тарқасты.
Самрат ҚҰСКЕНОВ,
“Soltüstık Qazaqstan”.