Soltüstık Казахстан
Қай өнер саласының болмасын өркендеуіне әсер ететін ең үлкен күш – сын. Сын әлсіресе өнер құлдырайды. Сыншылар өнерді тура жолға бағыттап, ұсақталудан, әлдебір ағымдар мен бағыттардың жетегінде кетуден сақтайды. Сол сияқты текті өнер – театрдың да өз сыны бар. Жуырда аталған саланың мамандары С.Мұқанов атындағы облыстық қазақ сазды-драма театрына жиналып, жергілікті әртістердің өнерін сүзгіден өткізді.
Театр апталығына өнертану ғылымдарының кандидаты Сәния Қабдиева, өнертану ғылымдарының кандидаты, театртанушы Айсұлу Сагитова, ГИТИС өнер институтының курс жетекшісі Екатерина Морозова келді. Олар бір апта бойы “12 минут”, “Кукарача”, “Жындының жазбалары”, “Шолпанның күнәсі” қойылымдарын тамашалап, талдайтын болады. Сонымен қатар театр актерлеріне арнап шеберлік сағаттарын өткізу жоспарланған.
– С.Мұқанов атындағы облыстық қазақ сазды-драма театры – жас өнер ордаларының бірі. Бұл ұжымға сыншылардың келуін мәдениет ошағының алға қарай бір қадам жасап, дамуға деген ұмтылысы деп білемін. Қазақстандық режиссер Әлібек Өмірбекұлының шығармашылығымен жақсы таныспын. Оның “12 минут” шығармасын көруге асықпын. Бұл А.Чеховтың “Шағала” пьесасының негізінде әзірленгенімен, режиссер сол арқылы ұлт тарихына терең бойлағысы келген. Сонымен қатар “Шолпанның күнәсі” қойылымын да сахнадан алғаш көретін боламын, – дейді Сәния Қабдиева.
Диас АЯҒАН,
“Soltüstık Qazaqstan”.