Soltüstık Казахстан
М.Қозыбаев атындағы Солтүстік Қазақстан университетінің ғалымдары Владилен Поляков пен Дмитрий Мокшин терек сығындысы бар емдік печенье ойлап тапты.
Ғылыми дерекке сүйенсек, бальзам терегінің биологиялық белсенді заттары, яғни, флавоноидтар қатерлі ісікке шалдыққан науқастардағы қанның негізгі көрсеткішін қалыпқа келтіруге көмектеседі. Ғалымдар осы өсімдік сығындысының дəрілік əлеуетін ашып, пайдаға жаратты. Олардың айтуынша, бальзам ағашында бактерияға, қабынуға қарсы шығып, жараларды емдейтін қасиет бар. Оны медицинада ғана емес, ауыл шаруашылығында да қолдануға болады.
Кондитерлер печеньенің эксперименттік нұсқасын жасап шығарып, оның дəстүрлі түріне бальзам терек сығындысы қосылды. Ғалымдар облыстық онкологиялық диспансермен бірлесіп зерттеулер жүргізді. Сəулелік терапиядан өткен науқастар флавоноидтармен жəне терек бүршіктерінен бөлінген басқа да пайдалы заттармен байытылған печеньені жеп көрді. Нəтижесінде науқастардың қан көрсеткіштері басқа бақылау тобымен салыстырғанда біршама қалыпқа келген. Гемоглобин мен эритроциттер 7,5 пайызға, лейкоциттер 20 пайызға өскен. Осылайша бальзамдық терек сығындысы бар печенье онкологиялық науқастар қанының негізгі көрсеткішін қалыпқа келтіруге көмектескен.
Елігімай ТӨҢКЕР.