Soltüstık Казахстан
Петропавлда волейболдан әйелдер командалары арасындағы ел чемпионаты өз мәресіне жетті. 4-ші турдың қорытындысы бойынша жергілікті “Қуаныш” клубы турнирлік кестедегі бірінші орнын сақтап қалды.
Турдың соңғы ойынын жерлестеріміз “Қарағанды” командасына қарсы өткізді. Үш партияның қорытындысы бойынша теріскейлік бұрымдылар 3:0 есебімен жеңіске жетті. Осылайша солтүстікқазақстандықтар 63 ұпаймен турнирлік кестеде бірінші орында қалды. Ал өскемендік “Берел” түркістандық “Тұранды” ұтып, екінші сатыға жайғасты. Үздік үштікті талдықорғандық “Жетісу” командасы қорытындлады. Олар “Айқаракөз” қыздарын ұтты.
Жарыс ережесіне сәйкес, плей-офф кезеңінде жерлестеріміз 8-ші орынға жайғасқан “Алтаймен” кездеседі. “Берел” болса, “Қарағандымен”, “Жетісу” командасы павлодарлық “Ертіспен” ойнайды. Түркістан қаласының “Тұран” клубы “Алматымен” күш сынасады. Барлық кездесулер Түркістанда өтпек.
Аманжол НҰРТАЗИН,
“Soltüstık Qazaqstan”.