Soltüstık Казахстан
Жастар саясаты – елдің болашағын айқындайтын басым бағыттардың бірі. Жастардың елін сүюі, жұмыспен қамтылуы, сапалы білім алуы, салауатты өмір салтын ұстануы – мемлекетіміздің жарқын болашағының кепілі. Бұған Мемлекет басшысының қатысуымен өткен “Адал адам – Адал еңбек – Адал табыс” тақырыбындағы Ұлттық құрылтай барысында тағы бір мәрте көзіміз жетті. Елдік, ұлттық, тарихи тақырыптар мен қоғамдағы өзекті мәселелер төңірегінде сөз сөйлеген ел Президенті қазіргі жастар туралы да ой қозғады.
Мен Қасым-Жомарт Тоқаевтың: “Аға буын жас ұрпаққа жол нұсқап, бағыт-бағдар беруі керек. Елімізде көзі ашық, көкірегі ояу, ойы ұшқыр, білімді жастар көп. Біз олардың бойына асыл қасиеттерді сіңіруіміз қажет”, – деген ұстанымымен келісемін. Жастарымыз түрлі бағытта дамып, қоғам өмірінің әр саласына белсенді қатынасуы керек. Кейінгі буын өкілдерінің жұмысынсыз ел өмірін елестету қиын. Сондықтан да жастардың белсенділігін арттырып, оларға жол ашу маңызды. Ал еңбекқор, ізденімпаз, білімді ұл-қыздарымыз көп болуы үшін оларды жаңа заманның қауіп қатерлерінен сақтай білуіміз керек. Сондай қауіптердің бірі – есірткі мен вейптерден төніп отыр. Мемлекет басшысы өз сөзінде осындай зиянды заттарға шектеу қойып, салауатты өмір салтын насихаттау туралы баса айтты. Бұл жастар арасында есірткіге қатысты қылмыс оқиғалары жүздеп саналатын біздің өңіріміз үшін маңызды. Кәмелетке толмаса да темекі тартып, ішімдік пен есірткінің арбауына түскен оқушылар мен студенттер қаншама. Жастар үшін есірткіге тәуелділік қаншалықты қауіпті болса, құмар ойындар да соншалықты қатерлі.
Бүгінде әлем сәт сайын өзгеріп, жаңа кедергілер пайда болуда. Біз бұл кедергілерді тек кемел білім, терең тәрбие, асыл құндылықтардың күшімен ғана жеңе аламыз. Жастарымыз қазіргідей өзгермелі әлемде көшке ілесіп, алға баса алмаса, артта қалуымыз ғажап емес. Президентіміздің көп алдында осы мәселелерді ашық көтеріп, назар аударып отырғаны оның жастар болашағына алаңдаушылығын көрсетеді. Кейінгі буын өкілдерінің түйткілдерімен тек жастар ұйымдары мен қоғам белсенділері ғана емес, билік өкілдерінің де айналысып жатқаны құптарлық іс. Алдағы уақытта біз де өз жұмысымызды Ұлттық құрылтайда қойылған міндеттерді жүзеге асыруға, жастарды қауіп-қатерден сақтауға, еңбек нарығындағы бәсекеге қабілеттілігін арттыруға бағыттайтын боламыз.
Дамир АБДИН,
Петропавл қалалық жастар ресурстық орталығының басшысы.