Soltüstık Казахстан
Облыстық әкімдікте өңір басшысы Ғауез Нұрмұхамбетовтің төрағалығымен су тасқынының зардаптарын жою жөнінде кеңес өтті. Қазір су тасқынынан зардап шеккен тұрғын үйлерді қалпына келтіру басты назарда. Тасқынның салдарын жою үшін және қалпына келтіруге келмейтін тұрғын үйлерді бұзу үшін барлық аудандардың әрқайсысынан 5 механикалық бригада мен 8 бірлік техникадан жасақталып, жөндеу-қалпына келтіру жұмыстарын жүргізбек.
Ойқала ауданында Петропавлдың 30 бригадасы жұмыс істейді. Бұл шағынауданда Ғ.Мүсірепов атындағы, Тайынша, Уәлиханов аудандарының бригадалары көмекке келмек.
Былғары зауытына Есіл, Жамбыл, Шал ақын және Айыртау аудандары бекітілді. Заречный кентінде М.Жұмабаев, Тимирязев, Ақжар және Мамлют аудандарының бригадалары жұмыс істейді. Аққайың ауданының бригадасы Қызылжар ауданына көмекке жіберіледі.
Жалпы тасқынның салдарын жоюға облыстың түкпір-түкпірінен барлығы 100-ден аса мехбригада жұмылдырылады. Жолдарды жөндеуге және тазалауға 50 техникасы бар 8 жол-құрылыс ұйымы бекітілген. Олар қажет болған жағдайда қалпына келтіру жұмыстарына тартылмақ.
Облыс әкімі Ғауез Нұрмұхамбетов жауапты мемлекеттік органдарға қалпына келтіру жұмыстарына қажетті бригадалар мен техникаларды бөліп, жұмыстарды қысқа мерзімде жүргізуді, сондай-ақ құрылыс материалдарының бағасын жасанды түрде көтеруге жол бермеуді тапсырды.
Су кеткесін, тез арада тұрғын үйлерді техникалық тексеру мен бағалауды жүргізу қажет, оның нәтижелері бойынша залалды өтеу туралы шешім қабылдануы керек. Сонымен қатар бірінші көтергіш сорғы станциясын қалпына келтіру бойынша іс-шаралар жоспарын әзірлеу тапсырылды.
Облыс әкімінің баспасөз қызметі.