Soltüstık Казахстан
“Таза Қазақстан” жалпыұлттық науқаны аясында өңірімізде “Бүкілқазақстандық ағаш отырғызу күні” акциясы өткізілді. Республикалық акцияның әр аптасы белгілі бір тақырыпта өтеді. Ал 27 сәуір – ағаш көшеттерін отырғызатын және екпелерді әктейтін “Жасыл аймақ” күні болды.
Бұл күні облыстың елді мекендерінің аумағында 1,5 мың адамның қатысуымен 19 мыңнан астам түрлі ағаш-бұта тұқымдас көшеттер отырғызылды.
“Солтүстікқазақстандықтар бұл акцияға қосылуға шешім қабылдады. Акция облыстың барлық аудандарында өтуде. Бұл шара – аумақты көгалдандыру үшін қажет, әрі қоршаған ортаға қамқорлық белгісі. Мемлекет басшысының 2 миллиард ағаш отырғызу тапсырмасын орындауға біз де өз үлесімізді қосамыз. Жоспар бойынша бірінші кезеңде 12 миллион, ал жалпы жыл соңына дейін 38 миллион ағаш отырғызу көзделген”, – деді облыс әкімінің орынбасары Рүстем Құрманов.
Көктемгі кезеңде орман қоры аумағында 2900 гектар алқапта ағаш отырғызу жұмыстарын жүргізу жоспарланған. Сондай-ақ “Таза Қазақстан” республикалық акциясы аясында Петропавл мен облыс аудандарында аумақтар тазартылды. Тұрғындар саябақтарды, саяжолдарды тазалап, үй маңындағы аумақтарды ретке келтірді.
Гүлфайруз ТӨРЕМҰРАТОВА,
«Soltüstık Qazaqstan».