Soltüstık Казахстан
Осыдан он жыл бұрын колледжде Қазақстан халқы облыстық ассамблеясының Бейбітшілік және келісім орталығы ашылған болатын.
Оның мақсаты – көп этносты қоғамның қазақстандық моделін зерделеу және студенттер арасында кеңінен насихаттау, тарихы мен мәдениетін таныстыру, патриотизмді қалыптастыру, ұлт пен ұлыстың тілі мен дәстүрлерін дамытуға үлес қосу. Осындай маңызды жұмысты атқаруға Бейбітшілік және келісім орталықтары үлес қосып отыр .
Орталықтың колледж қабырғасында ашылуында да зор мәні бар. Себебі студенттер – жалындаған жастар. Ал жастар – елімізде болып жатқан қоғамдық үдерістерге белсене қатысатын қоғамымыздың негізгі әлеуметтік тобы.
Бейбітшілік және келісім орталығы колледждің лингвистикалық орталығымен бірлесе отырып, қазақстандық патриотизмді қалыптастыру, түрлі этностардың мәдениетін зерделеу, тілдері мен дәстүрлерін дамытуға үлес қосу бағытында жұмыс істеп келеді. Туған өлке тарихын зерделеуге бағытталған іс-шаралар жүзеге асырылуда. Төл тарихымыз – ұлттық және әлеуметтік бірегейліктің өзегі. Туған жерге, мәдениетке, әдет-ғұрып, салт-дәстүрге деген ерекше көзқарас – патриотизмнің ең маңызды белгісі, ұлттың мәдени-генетикалық кодының негізі болып табылады.
Жоғары құрылыс-экономикалық колледжінде 20-дан астам ұлттың студенттері оқиды. Бейбітшілік және келісім орталығының осы күнге дейін атқарған қызметінің тәрбиелік мәні зор. Көпэтносты қоғамның қазақстандық моделін насихаттау аясында былтыр және биыл этносаралық толеранттылық пен қоғамдық келісімді нығайту, мемлекеттік тілді меңгеруді ұйымдастыру, теріскей өңірдің қызықты адамдарымен шығармашылық кездесулер өткізу, оқушыларды адамгершілік-патриоттыққа тәрбиелеу мақсатында 50-ден астам мәдени, ақпараттық, танымдық бағыттағы іс-шара өткізілді.
Оның ішінде арнайы ашылған Бейбітшілік және келісім кабинетінде “Ұлтаралық және конфессияаралық келісім. Толеранттылық”, “Бірлік – Қазақстанның тұрақтылығы мен өркендеуінің негізі” атты “дөңгелек үстел” отырыстары, сынып сағаттары, “Халықтар достығындағы Қазақстан бірлігі”, “Бейбітшілік пен келісім – Тәуелсіздіктің басты жетістігі”, “Тіл – достық көпірі”, “Ұлы дала тұлғалары” тақырыбында түрлі шаралар ұйымдастырылды.
Колледжде еріктілер қозғалысы бар. Өңірімізде табиғи апат орын алғанда студенттеріміз қарғын сумен күресіп, зардап шеккен жерлестерімізге қол ұшын соза білді. Күн-түн демей гуманитарлық көмекті түсіріп алуға білек сыбана кірісіп, қоғамдық жұмыстың бел ортасында жүрді.
Биыл Қазақстан халқы облыстық ассамблеясының Бейбітшілік және келісім орталығына 10 жыл толды. Алдағы уақытта мерейтой аясында бірнеше іс-шара жоспарланған. Атқарған жұмыстарымызды әлеуметтік желілерде және колледж сайтында, сонымен қатар жергілікті БАҚ арқылы жариялап тұрамыз. Ақпараттық-насихат жұмысының маңызы зор. Осының арқасында бірлігі жарасқан елдің іргесі берік, шаңырағы биік болады, ал өскелең ұрпақ діні мен діліне қарай бөлінбейтін, ұйымшыл, тату болып өседі.
Ағыбай КӨШІМБАЕВ,
Жоғары құрылыс-экономикалық колледжінің директоры.