Soltüstık Казахстан
Елордадағы Ұлттық академиялық кітапханада рәмізтанушы, ақын, Қазақстанның еңбек сіңірген қайраткері Ербол Шаймерденұлының туғанына 70 жыл толуына орай ғылыми-танымдық конференция өтті. “Ғасырлар қолтаңбасы немесе рәміздік танымның баспалдақтары” тақырыбындағы іс-шара аясында “Мәңгілік мұра: Елтаным..” атты кітап көрмесі ұйымдастырылды.
Конференцияға қатысқан қазақ әдебиетінің танымал тұлғалары, Парламент депутаттары, мәдениет және қоғам қайраткерлері, белгілі ғалымдар қазақ елінің тұңғыш рәмізтанушысы және Президенттің тұңғыш баспасөз хатшысы Ербол Шаймерденұлының мәдениет, тіл және геральдика саласына сіңірген еңбектері жайлы баяндап, жалпы азаматтық, адами қасиеттері туралы жылы естеліктерімен бөлісті. Жиынға қатысушылар рәмізтанушы туралы түсірілген “Ербол Шаймерденұлы: Тұлға” деректі фильмін тамашалады.
– Еліміз тәуелсіздік алған алғашқы күндерден бастап бойындағы барлық жігерін, қайратын, білімін егемендікке арнаған бір адам болатын болса, осы Ербол Шаймерденов деп айтар едім. Президенттің тұңғыш баспасөз хатшысы бола жүріп, мемлекетімізде әлі іске аспаған тұңғыш рәміздердің жүзеге асуына Ерболдың сіңірген еңбегі ұшан-теңіз. Тіл комитетінің төрағасы қызметін атқарғанда сан қилы мақалалар жазды. Ерекең жайында Әбдіжәміл Нұрпейісовтен бастап, Әбіш Кекілбаев, Әкім Тарази, Қуаныш Сұлтанов сынды еліміздің зиялы қауым өкілдерінің бәрі жылы сөздер айтқан, – деді жазушы Қуаныш Жиенбай.
Елтаңба авторы Жандарбек Мəлібекұлы Ербол Шаймерденұлының рəмiзтану саласының тереңге тамыр тартуына қосқан үлесін ерекше атап өтті. “Бүкіл дүниежүзіндегі елтаңбаларды қарап, соған талдау жасағаны маған қатты ұнады. Шын мəнінде өте білімді, дəстүрімізді терең білетін жан еді. Мемлекеттік рəміздер осы Ербол Шаймерденовтің көзі тірі кезде қалыптасты. Ерекеңнің бұл еңбегі – өз алдына зерттеуге тұрарлық жұмыс”, – деді Жандарбек Мəлібекұлы. Ол естелік ретінде өзі жасаған Елтаңбаның төсбелгісін Ербол Шаймерденұлының жары Күләш Қайыржанқызына табыс етті.
“Қазақ газеттері” серіктестігінің бас директоры, академик Дихан Қамзабекұлы сол жылдары қоғам қайраткерінің абыройлы қызмет еткенін айтты.
Конференцияда жазушылар Марат Мəжитов, Алтыншаш Жағанова, Роза Мұқанова, қоғам қайраткері Оразкүл Асанғазы қаламгерліктен қайраткерлікке жеткен тұлға туралы орамды ойларымен бөлісті.
Алқалы жиында қазақ әдебиетінің өзге де танымал өкілдері, қоғам қайраткерлері, тіл жанашырлары Ербол Шаймерденұлы туралы айтып, оның азаматтық, қаламгерлік, қайраткерлік қырларын шынайы ой-пікір, құнды естеліктерімен барынша ашуға тырысты.
– Ол әсіресе өзінің кіндік қаны тамған Жамбыл ауданындағы Жаңажол ауылын есінен бір шығармайтын. Мүмкіндік болған жағдайда отбасымызбен бірге жыл сайын дерлік ауылға жол тартатынбыз. Ауылдың маңындағы Ұлпан ананың зиратына, әкесінің басына барып, Құран бағыштайтын. Академик-жазушы Ғабит Мүсіреповтің жақсы көретін “Қызқарағайына” баратын, бала күндеріндегі көлдерге шомылатын. Сөйтіп, елден керемет көңілмен, күш-қайрат жинап, Астанаға оралушы еді,– дейді ақынның жары Күләш Шаймерденова.
Конференцияда Л.Гумилев атындағы университеттің студенттері ақынның өлеңдерін нақышына келтіріп оқып, айтыскер ақын Рауан Қайдар домбырамен арнау айтты.
Зарап ҚҰСАЙЫНОВ,
“Soltüstık Qazaqstan”.