Soltüstık Казахстан
Преснов ауылдық округі – ауданның келбеті әрі әлеуметтік-экономикалық дамуының айнасы іспеттес. Оның кіреберіс және кентішілік жолдары жөнделіп жатыр. Аудан орталығындағы Батырев, Е.Шайкин, Пионер көшелерін, Колхоз қиылысын жөндеуге 200 миллион теңгеге жуық қаржы бөлініп, тозығы жеткен жолдар, сондай-ақ оқушылар тұратын жатақхана қалпына келтірілді.
“Преснов ауылдық округінің орталығында жүргізіліп жатқан абаттандыру жұмыстарының аумағы – 2 гектар. Оның шамамен бір гектарына тас төселеді. Сонымен қатар балалар ойын алаңы, веложол салынады. Демалыс аймағына спорттық жабдықтар орнату қарастырылған. Железное ауылында көше шамдары қойылды. Негізгі шаралар аудан орталығында атқарылуда”, – дейді Преснов ауылдық округінің әкімі Қайрат Сансызбаев.
Бұдан бөлек, ауданда “Таза Қазақстан” республикалық экологиялық акциясы аясында көшелер 1500 тонна тұрмыстық қатты қоқыстан тазартылып, арнайы полигонға шығарылды. Әр бейсенбі тазалық күні ретінде белгіленген.
Пресновкадан Благовещенкаға шығаберіс жолды жөндеу де жалғасын тапқан. Железное ауылына дейінгі 18 шақырым және Пресноредутқа дейінгі 12 шақырым жол орташа жөндеуден өтеді. Қайранкөл ауылы бағытындағы облыстық маңызы бар жолды жөндеу жұмыстарына жобалық-сметалық құжат әзірленуде.
Сәулет, құрылыс, тұрғын үй-коммуналдық шаруашылығы, жолаушылар көлігі және автомобиль жолдары бөлімі басшысының міндетін атқарушы Болат Бейсенбаевтың айтуынша, ауыз-су мәселерін шешуде де игі қадамдар жасалуда. Айтуар мен Баянға су тазалағыш құрылғылар алынып, орнатуға конкурс жарияланбақ. Пресноредут пен Кабан елді мекендеріне 50 текше метрлік бөшке қойылады. Ұзынкөл мен Айымжан ауылдары бойынша мердігердің салғырттығынан жұмыс толық аяқталмай қалған болатын, жаңа егесі тұрғындарды сапалы ауызсумен жабдықтауға уәдесін беріп отыр.
Жергілікті тұрғындар ауылдың көркейіп, гүлденгеніне қуанышты.
“Болашақта біздің балаларымыз бен немерелеріміз осында тұрады ғой. Спорт кешені салынып, көшелер асфальтталып, абаттандырылып, саябақ ашылып, адам танымастай өзгеруде”, – дейді Пресновка ауылының тұрғыны Гүлбаршын Рәзиева.
Игілік РАХМЕТ.
Жамбыл ауданы.