Soltüstık Казахстан
Сәбит Мұқанов атындағы облыстық ғылыми-әмбебап кітапханада руханият ордасының 90 жылдығына орай мерейтойлық шара өтті. Шараға елордалық меймандар мен өңір кітапханашылары қатысты. Олар ХХІ ғасырдағы кітапханалардың жұмыс бағыттарын талқылап, кітап оқу мәдениетін қалыптастыру туралы сөз қозғады.
Кітапхананы тоқсан жылдығымен құттықтаған Қазақстан мәдениетін ғылыми-зерттеу орталығының директоры Үмітхан Мұңалбаева бүгінде дамыған әлем елдерінің бәрі кітапқа бет бұрғанын, еліміздің де рухани әлеуетін дамыту үшін кітапхана ісін қолдау керек екенін жеткізді. Профессор Зарқын Тайшыбай болса, кітапхана тарихының тым тереңде жатқанын, өткен ғасырдың басында Қызылжарда кітапхана болғанын, онда Міржақып Дулатұлы қызмет еткенін айта келіп, өзінің сиясы кеппеген жаңа еңбектерін сыйға тартты. Оқу-ағарту министрлігінің республикалық ғылыми-педагогикалық кітапханасының директоры Әлия Сайдембаева “Балалар кітапханасы” бағдарламасы туралы баяндады. Бағдарлама аясында арнайы портал іске қосылған. Онда балалар мен ересектер, кітапхана қызметкері кітаптармен танысып, каталог қарай алады. Порталда жас дарындардың тырнақалды туындылары тегін жарияланады.
Қазақстан мәдениетін ғылыми-зерттеу институтының қызметкері Бекзат Смағұлов қызылжарлықтарға ақын Олжас Сүлейменовтің құттықтау хатын жеткізді.
“Барша кітапхана ұжымына өз құттықтауымды білдіріп, алғыс айтамын. Мен ұлттың күші арсеналында емес, кітапханаларда екенін үнемі айтып келемін. Кітапхана адамзаттың интеллектуалды өмірінің ажырамас бөлігіне айналды. “Артық білім – кітапта” деп дана Абай айтқандай, кітапхана мәдени мұраның бір бөлігі ретінде ғылымның дамуына оң әсер етіп келеді. Мұндағы барлық қызметкерге өз ісіне адалдығы мен төзімділігі, еңбегі үшін алғыс білдіремін. Сіздерге шын жүректен өңір дамуына оң әсер ететін жаңа шығармашылық жетістіктер мен табысты жобалар тілеймін”, – делінген құттықтауда.
Кітапхана басшысы Бейбітгүл Әбілмәжінова жиылған меймандарға алғысын білдіріп, мәдени орынның ғасырға жуық уақыт ішінде жеткен жетістіктері туралы баяндады.
– Бұл – өткенімізді сарапқа салып, алдағы бағытымызды айқындайтын жауапты кезең. Кітапхана тарихы 1934 жылдан басталады. Осы жылдың сәуірінде Қарағанды облыстық партия комитетінің шешімімен Петропавл орталық қалалық кітапханасының базасында облыстық кітапхана құрылды. 1936 жылы бұл орын Солтүстік Қазақстан облыстық кітапханасы деп атала бастады. 1973 жылдың сәуірінде кітапхана Сәбит Мұқановтың қолдауымен салынған қазіргі ғимаратқа көшірілді. Мұнда жазушының аты берілгеніне де жарты ғасырдан асып барады, – дейді Бейбігүл Мағжанқызы.
1996 жылы кітапхана 5 грант жеңіп алып, жұмыс барысы автоматтандырыла бастаған. Облыста алғашқылардың бірі болып ғаламтор, электронды пошта, электронды каталог т.б. игіліктерді жұмысқа жаратқан мекеме де осы. Осы уақытқа дейін кітапхана 27 халықаралық байқаудың грантын иеленіп, республикада бюджеттен тыс қаражат тарту бойынша үздік атанған. 2000 жылдардың басында мұнда елдегі облыстық кітапханалардың ішінде алғаш болып электронды кітапхана іске қосылған. Бүгінде өлкетануға қатысты 140 мыңнан астам материал цифрландырылған. “Мағжан” порталы мен Сәбит Мұқановтың өміріне қатысты хронограф, өлкетанушылар мен жазушылардың цифрландырылған архиві, “Qyzyljar kitaphanasy” қосымшасы өңір тарихын танимын дегендерге көмек берері анық.
Мерейтойлық конференция екі күнге ұласып, қатысушылар түрлі тақырыптарда талқылау жүргізді. Келген меймандарға арнап көрме мен экскурсия ұйымдастырылды.
Бір өкініштісі, ауқымды іс-шараның басым бөлігі орыс тілінде жүргізілді. Бүгінгі күн үшін маңызды жастардың кітап оқуы, Қызылжар қаламгерлерінің әдебиетке қосқан үлесі, ауыл кітапханасы, әдеби өлкетану туралы негізгі баяндамалардың мемлекеттік тілде жасалмауы, өңірде тіл саясатының кенжелеп қалғанын көрсеткендей болды. Мекеменің тіркеу орнының өзінде мемлекеттік тілде қызмет алу қиын екені де жасырын емес.
Диас АЯҒАН,
“Soltüstık Qazaqstan”.