Soltüstık Казахстан
Облыстық ішкі мемлекеттік аудит департаментінің білікті мамандары жыл басынан бері 21 аудиторлық іс-шара өткізіп, 16,7 млрд. теңгенің заң бұзушылығын анықтаған. Олардың көбі мемлекеттік сатып алу заңнамасын бұзуға қатысты болып отыр.
Аталмыш департаменттің бірінші жартыжылдықты қорытындылау есебіне жергілікті атқарушы орган өкілдері мен қалалық және аудандардан келген түрлі ұйым басшылары қатысты.
Басқосуда облыстық ішкі мемлекеттік аудит департаментінің басшысы Зәуреш Қапарова тексеріс нәтижесінде 155 адам әкімшілік жауапкершілікке тартылып, 13,8 млн. теңге айыппұл арқалағанын айтты. Айтуынша, мемлекеттік сатып алуды ұйымдастырушылар құқық бұзушылыққа жиі барады. Олар көпшілікті тендерге қатыстырмайды, конкурсқа жіберген күннің өзінде біршама құжат жинатады. Заңда жоқ талаптар мен ережелерді ойлап тауып, әуре-сарсаңға салады. Алайда сала мамандары аталмыш олқылықтарды түзету үшін ауқымды жұмыстар атқаруда.
Аудиторлар тексеріс барысында, сонымен қатар, кәсіпорындардағы материалдық-техникалық базаға, мемлекеттік қызметке бөлінген қаржының толығымен игерілмегені, бюджеттен бөлінген ақшаның тиісті жерге жетпегені анықталған. Осыған байланысты аудиторлар ақшаны жымқырғандарды тиісті органдар арқылы әкімшілік жауапкершілікке тартып, ел қазынасына 4,3 млрд. теңге қайтарған.
– Мамлют ауданына іссапармен барған кезде сәулет, құрылыс, тұрғын үй-коммуналдық шаруашылығы, жолаушылар көлігі және автомобиль жолдары бөлімінен құқық бұзушылықтар анықтадық. Сала мамандары 23 млн. теңгеден астам ақшаны толық игермеген. Біз бұны жергілікті атқарушы органдарға жібердік. Олар енді тиісті шаралар қолдануы тиіс, – дейді Зәуреш Қапарова.
Облыс аудиторлары интернет арқылы да кәсіпорындардың жұмысына мониторинг жүргізіп, онлайн режімде тексеріп отырады. Бұл орайда жыл басынан бері камералдық бақылаумен 274,7 млрд. теңгеге 13 мың 503 мемлекеттік сатып алу рәсімі қамтылған. Соның ішінде 20 млрд. теңге сомасындағы 1860 заң бұзушылық анықталды. Мамандар өткізілетін сатып алуға қатысуға шектеу қою және қиындату жиі кездесетінін тілге тиек етті. Мәселен, электронды аудит бойынша 959 хабарлама түскен болса, оның 820-сы мемлекеттік сатып алуға қатысты болған. Бүгінгі күнге дейін соның 62 пайызы қаралған.
Жалпы облыстық ішкі мемлекеттік аудит департаментінің қызметкерлері айына екі рет аудандарға барып, тексеріс жүргізеді. Олар жуырда ғана Айыртау мен Шал ақын аудандарында болып, бірнеше құқық бұзушылықты анықтаған. Игерілмеген сома көлемі 88 млн. теңгені құрайды.
Гүлфайруз ТӨРЕМҰРАТОВА,
“Soltüstık Qazaqstan”.