Soltüstık Казахстан
Францияның Париж қаласында өтіп жатқан жазғы Олимпиадада отандастарымыз жақсы нәтижелерге қол жеткізуде. Жарыстың бірінші күнінде жұптық сында пневматикалық мылтықтан нысана көздеген Ислам Сәтпаев пен Александра Ле қоржынға алғашқы қола жүлдені салса, әйгілі дзюдошымыз Елдос Сметов жеңіс тұғырының ең биігіне көтерілді.
Өткен демалыс күндері отандық спортшылар спортсүйер қауымға қуаныш сыйлады. Париж Олимпиадасында ел қоржынына алғашқы жүлдені пневматикалық мылтықпен аралас командалық сында 10 метрден нысана көздеген Ислам Сәтпаев пен Александра Ле салды. Алғаш рет Олимпиада ойындарына қатысып тұрған Ислам Сәтпаев пен Александр Ле жұбы Германия құрамасынан басым түсті.
Ал дзюдошылар сынында 60 келі салмақта өнер көрсеткен Елдос Сметов көптен күткен алтын медаліне қол жеткізді. Осы жолы отандасымыз финалдық белдесуде Францияның балуаны Лука Мхеидзені ұтып, қазақ спорты тарихына өз есімін алтын әріппен жазды. Елдос 2016 жылғы Риодағы додада күміс еншілесе, 2020 жылы Токиода қола жүлдегер атанған болатын. Енді міне жетпей тұрған алтын медальді де қанжығасына байлады.
Олимпиада чемпионын алғашқылардың бірі болып Мемлекет басшысы құттықтады. Қасым-Жомарт Тоқаев дзюдошыға қоңырау шалып, жеңісі үшін алғысын білдірді.
“Қазақтың рухын, жалпы халқымыздың мықты мінезін көрсеттің. Бәріміз сені мақтан тұтамыз. Сөзіңде тұрдың, тамаша жеңіске жеттің, нағыз жігітсің! Сен сияқты жігіттердің арқасында туымыз әрқашанда асқақтап, желбірей берсін. Жаңа жеңістерге жете бер. Саған және отбасыңа аманшылық тілеймін. Астанада кездескенше!” – делінген Президент Қасым-Жомарт Тоқаевтың құттықтау хатында.
Францияда өтіп жатқан Олимпиада ойындарының финалында Елдос Сметов татамиге Жапонияның даңқты дзюдошысы Наохиса Такатоның кимоносын киіп шыққанын айта кеткен жөн.
– Мен Елдосты жеңісімен құттықтаймын. Ол финалда мен сыйлаған кимононы киіп шығып, чемпион атанды. Қазақ елі, алғашқы алтын жүлде құтты болсын. Біз Елдос екеуіміз татамиде қарсылас болсақ та, өмірде доспыз. Оған деген құрметім ерек. Ол Қазақстанның ең танымал спортшыларының бірі екенін білемін. Елдос – мықты спортшы. Париж Олимпиадасында Қазақстан қоржыны жүлдеге тола берсін, – деді даңықты жапониялық спортшы.
Жеңісті жолды тағы бір дзюдошы Ғұсман Қырғызбаев жалғады. 66 келі салмақта күрескен балуан жартылай финалда 24 жастағы бразилиялық қарсыласы Виллиан Лимадан ұтылып қалғанымен, қола үшін тартыста “вазари” әдісінің арқасында жеңіске жетіп, үшінші орынға қол жеткізді.
Париж қаласында алауы тұтанған XXXIII жазғы Олимпиада ойындарында спортшылар 32 спорт түрінен 329 медаль жиынтығын сарапқа салады. Қазақстандықтар төрт жылда бір өтетін додада спорттың 25 түрінен 92 жолдама жеңіп алған болатын.
Аманжол НҰРТАЗИН,
“Soltüstık Qazaqstan”.