Soltüstık Казахстан
“Қарызсыз қоғам” жобасы аясындағы оқу курстары Петропавл қаласынан бөлек, аудандарда да өтіп жатыр. Оқуды 4 бизнес-сарапшы өткізуде.
Жоба борышкерлердің санын азайтып, халықтың қарыз жүктемесін төмендетуге бағытталған. Қазіргі таңға дейін өңірде 3200 адам қаржылық сауатын арттырып үлгерген. Қаржылық сауаттылық жөніндегі сарапшы Дмитрий Шледевицтің айтуына қарағанда, курстан өтіп жатқандар арасында түрлі жағдайға тап болған жандар жетерлік. Халықтың басым көпшілігі аса қажеті жоқ тауарлар мен қызметтерді де несиеге рәсімдейді екен.
“Консультацияда қиын жағдайға тап болған тұрғындарды анықтаймыз. Көп жағдайда азаматтар өз проблемаларымен банкке жүгінуден қорқады. Біз тұрғындарға мәселені бастапқы кезеңде шешу керектігін, қиын жағдайдан шығудың жолы бар екенін айтамыз. Бір сөзбен айтқанда, жоба өз нәтижесін беріп жатыр”, – деп атап өтті қаржылық сауаттылық жөніндегі сарапшы Дмитрий Шледевиц.
Партия мүшелерінің, мемлекеттік органдар өкілдерінің, екінші деңгейлі банктердің және заң консультанттарының қатысуымен өткен кеңесте “Қарызсыз қоғам” жобасын іске асыру кезінде туындайтын мәселелер талқыланды.
“Қарызсыз қоғам” жобасы жыл соңына дейін жалғасады. Жоспар бойынша оқудан 5500 адам өтуі керек.
Самрат ҚҰСКЕНОВ,
“Soltüstık Qazaqstan”.