ОТАННЫҢ КҮЗЕТІП ІРГЕСІН

Шекарашылар – алдыңғы шеп­те тұрған жауынгерлер. Егер ел шетіне тұтқиылдан жау тисе, жердің тұтастығын сақтап қалу, басқа тиісті күштік құрылым жет­кенше оларды шекарадан өткіз­бей ұстап тұру осы жауынгерлердің міндетіне жатады. Оның үстіне шекарашылар күні-түні қызмет етеді. Себебі шекара еш­қашан күзетсіз қалмауы тиіс.

Шекара шебінде тұрған сарбаздарға қарап бой түзеп, Отан қор­ғаушы мамандығын таңдағандар аз емес. Сондай азаматтар­дың бірі – Әуелбек Жадрин.

Әуелбек Ғалиақпарұлы 1985 жылы Ақжар ауданындағы Ре­сейдің Омбы облысы, Полтавка ауданымен шекаралас Менжин­ское ауылында дүниеге келген. Ол елдің шетінде, желдің өтінде елі­міздің тыныштығы мен қауіп­сіз­дігін қалт жібермей күзетіп жүр­ген жауапты мамандық иелерінің қызметіне қызыға қарап, шекарашы болуды армандайды. 2001 жылы ауылдағы орта мектепті тамамдап, 2003-2005 жылдары Алматы қаласындағы Әуе қорға­ныс күштері қатарында Отан алдындағы борышын өтеп келгесін, бала күнгі арманын жүзеге асыру үшін құжат жинайды. 2006 жылы Ұлттық қауіпсіздік қызме­тінің Шекара қызметіне келісім­шарт бойынша жұмысқа қабыл­данып, еңбек жолын “Келтесай” шекара бө­лімшесінде аға атқыш лауазымынан бастайды. 2008 жылы осы атқыштар бөлімшесінің командирі болып тағайындала­ды. Ел шебінде жүріп көзге түскен Әуелбек 2009 жылы “Баян Батыр” (бұрынғы атауы “Қарақоға”) шекара бөлімшесінің аға технигі лауазымына жоғарылап, бүгінгі күнге дейін осы қыз­метті абыроймен атқарып келеді. “Баян Батыр” шекара бөлімшесі Мағжан Жұмабаев ауданында орналасқан. Ауданның солтүстігі мен шығысы Ресеймен шекара­ласып жатыр. Шекара бөлімшесінің не­гізгі қызметі техника мен құрал-саймандарды жауын­герлік жағдайда ұстап, кез келген уақытта заңсыз шекара бұзушы­лардың жолын кесу болып табы­лады. Ал Әуелбек Жадриннің мін­деті – жо­ғарыда аталған қызметтерді қадағалап, бақылауда ұс­тап отыру. Тәжі­рибелі шекарашы өзіне де, сақшыларға да талапшыл, тәртіп­ке қа­тал. Кез келген ұсақ-түйекке назар аударып, бұйрықтар­ды уақытында әрі бұлжытпай орындап отырады.

Білімді, қайратты жас командир қарамағындағы сарбаздармен күні-түні шекараны күзетіп, жылдың барлық мезгілінде егемен еліміздің беріктігі мен халқының тыныштығын сақтауда міндеттеріне адалдық танытуда. Әрине, барлық ынта-жігермен, жауапкершілікпен атқарған ең­бек жемісті болатыны сөзсіз. Әуелбек Жадрин қызметке кіріскен жылдардан бастап бүгінге дейін шекараны заңсыз бұзып өтпек болған 167 азаматты ұстады.

– 2023 жылы 20 мамырда түн­гі сағат 01.30 шамасында шекара бөлімшесінің бастығы дабыл қағып, командирдің “Қаруға!” де­ген пәрмені бойынша “Тосқауыл” тобының жетекшісі ретінде әске­ри көлікпен шекара шебіне жедел жеттік. №2877 шекара белгісінің аумағында Бангладеш республикасының 12 азаматын ұстадық. Шекараны заңсыз кесіп, Ре­сей Федерациясына өтпекші бол­ған. Оларды шекара наряды байқаған. Шекарашылардың назарына іліккенін сез­ген­дер жасырынбақ ниетте ор­манға қашқанымен, қарамағымдағы әскери қызметшілердің қырағылығы, қызметтік ит Рисананың көмегі және жедел жауын­герлік даярлықтың арқасында шекара бұзушыларды ұстап, шекара бөлімшесіне жеткіздік, – дейді Әуелбек Жад­рин.

Әуелбек Жадрин аға техник ретінде бөлімшедегі МТЗ тракторы, УАЗ автокөлік­тері, қарда жүргіш техникаларға жауапты. Өзіне сеніп тапсырылған техника мен құрал-саймандардың үнемі жауынгерлік жағдайда болуы, заңсыз шекара бұзушылардың жолын кесу кезінде шекара қызметкер­лерінің жедел әрекет етуі үшін сақадай сай тұруы оның міндетіне жатады.

– Әскери қызмет менің өмі­рімде маңызды орын алады. Екі жыл бойы әскери тәртіпке, жауапкершілікке және сабырлы, шыдамды болуға үйрендім. Жо­ғары жауынгерлік дайындықтан өтіп, әскери мамандықтың қыр-сырына қанықтым. Күні бүгін сол әскерден үйренгенімді тәжірибемен толықтырып келемін. Қазіргі жастарға қай сала­ны таңдаса да, ер жігіт алдымен еліне қызмет ету керек деп ағалық кеңесімді айтқым келеді, – дейді шекара қызметінің аға сержанты.

Тәжірибелі шекарашы Қазақстан Республикасы Ұлттық қауіп­сіздік комитетінің ІІ және ІІІ дәрежелі “Мінсіз қызметі үшін”, ІІІ дәрежелі “Ұлттық қауіпсіздік қалқаны” медальдарымен марапатталған.

“Әскери баспана” бағдарла­масы бойынша пәтер алған шекарашы зайы­бы Аңсағанмен 6 бала тәрбие­леп, қазіргі таңда өзі күзететін шекара аймағындағы Қарақоға ауылында тұрып жатыр.

Мемлекеттік шекараның беріктігі – елдігіміздің басты белгісі. Тәуелсіздігіміздің алғашқы күні­нен бастап еліміздің шекарашы­лары құрлықта, теңізде, өзендер мен өзге де су жолдарында мем­лекеттік шекараны күзетеді. Со­нымен қатар темір жол, автокөлік, теңіз, өзен, әуе жолы және өзге де жерлер арқылы өтетін ше­кара шептері Үкімет белгілеген өткізу пункттері арқылы айқындалады. Сондықтан шекара шебінен өтуге болмайтын жерлер арқылы контрабандалық жүк тасымалдау, тәуелсіз мемлекетімізге экономикалық зиян келтіруге бағытталған кез келген заңсыз әрекеттерге шекарашы­лар тосқауыл қояды.

Ендеше еліміздің тыныштығы мен шекарасының қауіпсіздігін қырағылықпен, жоғары жауапкер­шілікпен күзетіп жүрген Әуелбек секілді қырағы Отан қорғаушыларымыз аман жүрсін дейміз.

Гүлфайруз ТӨРЕМҰРАТОВА,

“Soltüstık Qazaqstan”.