ТАЙЫНШАДАҒЫ ТАРТЫМДЫ ЖОБАЛАР

Тайынша ауданында ауыл шаруашылығы саласы бойынша бірқатар озық жобалар сәтті жүзеге асырылып жатыр. Соңғы жылдары шағын өндіріс орындары бой көтеріп, Шопан ата түлігі көптеп өсіріліп, тамшылатып суару әдісіне жете ден қойылған.

Өңір басшысы Ғауез Нұр­мұ­хам­бетов аудандағы жұмыс са­парын шаруашылықтарды аралаудан бастады. “Аманат” ша­руа қожалығы 0,5 млрд. тең­генің инвестициялық жобасын қолға алған. Бүгінге дейін 4,5 мыңға жуық ұсақ мал сатып алынса, Қарағанды облысынан қосымша 600 бас әкелмек. Негізгі өнім Астанаға жө­нел­тіледі. Енді Катар мен Ду­байға да экспорттау жоспарланып отыр.

Красная поляна елді мекенінде орналасқан “Зеленые Луга” шаруа қожалығының ди­ректоры Юрий Красноголовый “Солтүстік” әлеуметтік-кәсіпкерлік корпорациясы арқылы 700 млн. теңгеге қаржыланды­ры­лып, 790 ірі қара сатып алын­ға­нын жеткізді. Бұдан бөлек, 400 бас сауын сиырға шақ­талған ферманың құрылысы жүргізілу­де. Нысан күзге таман пайда­лануға берілетін болады.

Өңір басшысы “Таң” шаруа қожалығында болып, тамшы­латып суару технологиясымен та­нысты. Биыл мұнда картоптың 7 түрі отырғызылыпты. Тіршілік нәрі бір гектар аумақты алып жатқан жасанды су қой­масынан жеткізіледі.

Ауыл тұрғындарының бірі Ни­­колай Шмидт ірі қара мен шошқа өсіреді. Оның айтуын­ша, қосалқы шаруашылықты да­мытуға мүмкіндіктер жеткілікті. Жемшөп мол.

Ғауез Торсанұлы ауыл шаруашылығы тауарын өндіруші­лермен өткізген кездесуде егін орағының басталуына аз қалғанын айтып, аса жауапты науқанды қысқа мер­зімде ұйымшылдықпен атқару­дың маңыздылығын атап көр­сетті.

Аудан әкімі Берік Әлжанов 122 мың гектар алқаптың шөбі шабылғанын, жемшөптің бір жа­рым жылдық қоры жасала­ты­нын баяндады. 750 комбайн ас­тық бастыруға әзір, оның 460-ның өнімділігі жоғары. 11 мың тон­на жанар-жағармай қажет.

Ауданда жалпы ұзындығы 190 шақырым жолды қалпына келтіруге 4 млрд. теңге бөлін­ген. Келлеровка – Южное бағытындағы жолға орташа жөндеу жүргізіліп, 2025 жылдың мамыр айында іске қосылады.

Жоба құны – 590 млн. теңге. Заречное ауылында Шағалалы өзені арқ­ылы жалғасатын көпір­ді қалпы­на келтіру қыркүйек айында аяқталады. Өңір басшысы көктемгі су тасқыны кезінде зақымданған Ясная Поляна – Ти­хо­океан – Шұңқыркөл – Көкшетау – Омбы жолдарын аралап көрді.

“Бұл жерлердің топырағын су шайып кеткендіктен, жөн­деуге биыл 521 млн. 500 мың теңге бөлінді. Қайта қалпына кел­­ті­ру жұмыстарына бір жүк тие­гіш, екі бульдозер, бір экска­ва­тор жұмылдырылған”,– деді об­лыстық жолаушылар көлігі және авто­мо­биль жолдары бас­қармасы басшысының міндетін атқарушы Ерден Шортыбаев.

Облыс әкімі әлеуметтік ны­сандарды аралап, жаңа оқу жы­лына дайындық және абаттандыру жағдайымен танысты. Крас­ная поляна орта мектебіне 138 млн. теңгеге күрделі жөндеу жүргізі­луде. “Таза Тайынша” бағ­дар­ла­масына 4300-ге жуық адам атсалысқан, 167 тех­ни­ка жұмылдырылған, 800 тонна­ға жуық қоқыс шығарылған.

Ғауез Нұрмұхамбетов бұ­дан кейін орталық кітапханаға бар­ды. Кітапханада және ауылдық мә­дениет ошақтарында жиһаз­дар жаңартылған. Кітапханада же­ңілдетілген несие және грант алушылар өнімдерінің көрмесі ұйымдастырылды. Келушілер назарына қолөнер бұйымдары мен киім-кешек түр­лері ұсынылды. Олардың қата­рында нан өнімдерін пісіруді қолға алған “Күміс алқа” иегері Сәуле Сәдібекова да бар.

Өңір басшысы №5 орта мек­тепте болып, білім беру ұйымдарының директорлары­на оқушы­ларды тасымалдай­тын 8 ша­ғын автобустың кілтін салтанатты түрде табыс етті.

“Екі аптадан кейін жаңа оқу жылы басталады. Біз жыл сайын мектептердегі жөндеу жұ­мыстары мен материалдық-техникалық базаның нығаюына көңіл бөліп келеміз. Биыл 38 автокөлік сатып алын­ды”, – деді Ғауез Торсанұлы.

“Мектепке жол” республи­калық акциясы аясында бала­лар­ға кеңсе тауарлары са­лын­ған сөмкелер берілді.

Облыс әкімі жұмыс сапары­ның соңында тұрғындармен кез­десіп, ауданның бірінші жартыжылдықтағы әлеуметтік-экономикалық даму қорытын­ды­л­арын талқылады.

5 елді мекенде су тарату же­лілері, 21 ауылда су тазарта­тын к­ешенді блок модуль­дері орнатылуда. 3 мектепте күрделі жөндеу аяқталды, Драгомиров­када жаңа білім ошағы бой кө­тереді. Кезекте тұрған­дар үшін 50 пәтерлі тұрғын үй­дің құры­лысы жүргізілуде. Ауылішілік жолдар мен тротуарларға асфальт төселуде.

“Жаңбыр не қар жауса, электр сымдарының қысқа тұйық­­талуы орын алып, жарық өшіп қалады. Арнайы бри­гада келгенше сарылып кү­тіп отырғанымыз. Бұрын элек­трик­тер бригадасы әр кеңшар­да болат­ын. Ақауды тез қал­пына келтіріп беретін. Осы дәстүрді жаңғыртуға ықпал жасауы­ңызды өтінеміз. Электр же­лілері де әбден тозған”, – десті жиында сөйлеушілер. Бұл сауалға “Көк­шетау-энерго” компаниясының басшысы нақты жауап бере алмады. Түйткілді проб­ле­маны бөлінетін қаржының аздығымен тү­сіндіріп бақты. Сондай-ақ кезде­суде көмір бағасы­на, жол және сапалы медицина­лық қызметке қатысты да әңгіме өр­біді.

Өңір басшысы жиынды қорытындылап, көтерілген мәселелерді шешу үшін жауапты басшыларға нақты тапсырмалар жүктеді.

Өмір ЕСҚАЛИ,

“Soltüstık Qazaqstan”.