Soltüstık Казахстан
“Наурыз” және “Отау” ипотекалық бағдарламаларына қатысу шарттары өзгерді. “Отбасы банкі” жеңілдетілген ипотекалық бағдарламаларға қатысушыларды қосымша қабылдау жариялады. Қабылдау 16-25 қыркүйек аралығында өтеді.
Қатысушылардың негізгі тізіміне енбеген қазақстандықтар, сондай-ақ “Отбасы банкінің” тұрғын үй бағдарламалары аясында бұрын өтінім бермеген жаңа үміткерлер “Баспана Маркет” порталында “Наурыз” және “Отау” бағдарламаларына қатысуға өтініш бере алады.
Сонымен қатар екі бағдарламаның шарттары біріздендірілді. Бұған дейін бағдарлама шарттарында ұқсастық көп еді. “Наурыз” бағдарламасы бойынша несиенің ең жоғары сомасы өсті. Астана қаласы үшін бұған дейін 30 миллион теңге болса, қазір бұл сома 36 миллионға жетті. Ал алматылықтар үшін ең жоғары сома 30 миллион теңге болып белгіленген. Бұған дейін Алматы қаласындағы қатысушылар үшін шекті сома 18 миллион теңге еді.
“Отау” бағдарламасына қатысушылар үшін салымдарды жинақтау мерзіміна қатысты талап алынып тасталды. Сондай-ақ Алматы немесе Астана қалаларында тіркеуі болуы міндетті емес. “Наурыз” бағдарламасында бұған дейін қолданылып келген балл есептеу механизмі өзгеріссіз қалады және екі бағдарламада да бірдей есептеледі. Сонымен қатар тұрғын үй жағдайын жақсартуға мұқтаж ретінде есепте тұрған азаматтар үшін екі бағдарлама бойынша да сыйақы мөлшерлемесі 7 пайызға дейін төмендетіледі. Жылдық тиімді пайыздық мөлшерлеме 7,3 пайыздан 8,9 пайызға дейінгі аралықта болады.
Мынадай бірыңғай балдық жүйе пайда болады: депозит бойынша сыйақы сомасына – әрбір 1000 теңгеге 1 ұпай; тіркелген некенің болуы – 5 балл; балалардың болуы – 10 балл (балалардың санына қарамастан); халықтың әлеуметтік осал топтары мәртебесінің болуы – 10 балл; жасы 35-ке дейін қоса алғанда – 5 балл.
Әсет ҚАНАФИН.