Soltüstık Казахстан
Өңірге АҚШ-тың Аризона университетінің вице-президенті Шейн Берджесс бастаған делегация келді. Шетелдік әріптестерді облыс әкімі Ғауез Нұрмұхамбетов қабылдады. Кездесуде жоғары білім саласындағы стратегиялық серіктестік және аграрлық ғылымды дамыту мәселелері талқыланды.
“Қазір М.Қозыбаев атындағы Солтүстік Қазақстан университеті Аризона университетімен бірге қос дипломдық бағдарламаны жүзеге асырып жатыр, соның арқасында біздің студенттер америкалық жоғары оқу орнының білім беру ресурстарына қол жеткізді. Мұнда АҚШ, Түркия, Қазақстан және басқа елдердің жетекші профессорлары дәріс береді. Сондай-ақ студенттердің АҚШ-та бір семестр бойы оқуға мүмкіндігі бар. Біз білім беру сапасын жақсарту және аймақта тартымды орта құру үшін Аризона университетімен серіктестікті нығайтуды жалғастырамыз”, – деп жазды өңір басшысы әлеуметтік желідегі парақшасында.
Жергілікті университетте халықаралық бағдарлама бойынша Қазақстанның әртүрлі қалаларынан және шетелден келген барлығы мыңнан астам студент білім алып жатыр. Олардың барлығы әлемде жоғары бағаланатын Аризона университетінің дипломын алады.
Ақерке ДӘУРЕНБЕКҚЫЗЫ,
“Soltüstık Qazaqstan”.