Soltüstık Казахстан
Астана қаласында өтіп жатқан Дүниежүзілік көшпенділер ойындарынан ақжолтай хабар жетті. Қазақ күресінен 60 килограмм салмақ дәрежесінде Қазақстанның намысын қорғаған “Қызылжар арландары” клубының мүшесі Мейіржан Берекетов алтыннан алқа тақты. Ол финалда Әзірбайжан балуанының жауырынын бозкілемге тигізді. Мейіржан барлық қарсыластарын айқын басымдықпен жеңгенін айта кеткен жөн.
Біз “Қызылжар арландары” клубының директоры Алтынбек Аусағитовпен телефон арқылы хабарласып, шәкіртінің жеңісімен құттықтаған болатынбыз.
– Бұл – Қызылжардың ғана емес, бүкіл Қазақ елінің қуанышы. Қазақ күресінен жігіттеріміз де, қыздарымыз да намысты қолдан бермеуде. “Қызылжар арландары” клубының сапынан Мейіржан Берекетов еліміздің құрама қомандасында өнер көрсетіп, жеңіс тұғырының ең биік сатысынан көріне білді. Бұл – бәрімізге ортақ қуаныш, – деді Алтынбек Аусағитов.
Абай облысының Ақсуат ауданындағы Екпін ауылының тумасы Мейіржан Берекетов 2018 жылы “Қызылжар арландары” клубы құрылғаннан бері оның сапында қазақ күресімен айналысып келеді. Ол бірнеше жарыста жеңімпаз атанған.
Зарап ҚҰСАЙЫНОВ,
“Soltüstık Qazaqstan”.