Soltüstık Казахстан
Ғ.Мүсірепов атындағы облыстық балалар мен жасөспірімдер кітапханасында белгілі журналист, жазушы Бақыт Мұстафинды еске алу кеші өтті. Жиынға жазушының зайыбы, әріптестері мен мектеп оқушылары қатысты.
Артына өшпес із, өлмес мұра қалдырған қаламгер саналы ғұмырын журналистика саласына арнады. Облыстық “Soltüstık Qazaqstan” (бұрынғы “Ленин туы”) газетінде 45 жыл табан аудармай жұмыс істеген журналисттің басылымның дамуы мен гүлденуіне қосқан үлесі зор. Көзі тірісінде 10-нан астам кітабы жарық көрген.
Жазушының зайыбы Дәмелі Мұстафина жұбайының өмірде өте биязы, қарапайым, мәдениетті адам болғанын айтты. “Балаларды ерекше жақсы көрді. Сондықтан болар, бұл тақырыпты әңгімелерінің негізгі өзегіне айналдыра білді. Бәкең асыл жар, ардақты әке ғана емес, өңір журналистикасының, соның ішінде “Soltüstık Qazaqstan”-ның ыстығына күйіп, суығына тоңған жан”, – деді ол.
Жаны жайсаң азаматтың тәлімін көрген әріптесі Дәмет Бектасова да еске алу кешіне қатысып, естеліктерімен бөлісті. Қолынан қаламын тастамаған журналисттің газетте жарияланған талай мақаласы тасқа басылған шежіредей қаттаулы тұрғанын айту қажет. Оның “Жәлел Қизатов”, “Жайнаған жер”, “Құрманғали Сұрағанов”, “Диқан жолы”, “Далам – дәулет ордасы” сияқты очерктер жинақтары мен балаларға арналған “Тәтті сәбіз” кітапшасы оқырмандардың сүйікті туындысына айналған.
Гүлмира ТЕМІРҒАЛИҚЫЗЫ,
Ғ.Мүсірепов атындағы облыстық балалар мен жасөспірімдер кітапханасының қызметкері.