Soltüstık Казахстан
Өмірде әр адам ақыл толыстырып, білімін шыңдау жолында оқу нәрімен сусындатқан жандарға ерекше қарыздар екенін сезінеді. Ол – ұстаз. Ұстаз – адамның бұл дүниеде ілмегенді ілдіретін, білмегенді білдіретін, санаға ақыл ұялататын, арманды алдан қиялататын, өмірді ұғынуға себеп, тірлікке кірігуге көмек болатын, шәкіртін өмірге баулушы, жақсы мен жаманды, обал мен сауапты үйретіп, адамгершілік қасиеттерді сіңіруші ата-анадан кейінгі жанашыры және ақылшысы.
Мұғалім мамандығы қашан да зор құрметке ие. Адамзат баласы ұстаздан дәріс алып, өмірінің іргетасын ол берген білім мен тәрбие негізінде қалайды. Ортамызда талай жеткіншектердің бойына білім мен өнерді, адамгершілік пен адалдықты, туралық пен шыншылдықты сіңіріп, тұлғалы азамат болып қалыптасуына зор үлес қосып жүрген жандар аз емес. Солардың бірі – Бейнегүл Уәлиқызы Тасмағамбетова.
Ол 1980 жылы Петропавл педагогикалық институтының физика-математика факультетін бітірген. Еңбек жолын Кривощеково орта мектебінде математика пәнінің мұғалімі болып бастайды. 1990-2011 жылдары директордың оқу-тәрбиесі жөніндегі орынбасары болып жұмыс істеді. 2011-2022 жылдары аталмыш білім ордасының директоры болды.
Математика – өте күрделі пән. Сондықтан болар оған қызығушылар саны көп деп айта алмаймыз. Бейнегүл Уәлиқызы өзінің талапшылдығымен, оқушы жүрегіне жол таба білуінің арқасында есеп шығаруға құмар өрендердің қатарының қалыңдауына септесіп келеді.
“Кез келген баланың бойында қауызын ашпаған қабілет пен талант бар. Оны ұстаз көре білуі керек. Сонда ғана баланың пәнге ғана емес өз болашағына деген сенімі нығая түседі. Біз оқушыны жеке тұлға, елдің ертеңі деп бағалағанда ғана жақсы нәтижелерге қол жеткіземіз”, – дейді ұстаз.
Педагог өз жұмысында заманауи ақпараттық-коммуникациялық технологияларды белсенді пайдаланады, презентациялық материалды дербес әзірлейді және сабақтар мен сыныптан тыс іс-шараларды өте қызықты өткізуге машықтанған. Бүгінде мектебімізде математикадан ғылыми зерттеулерге, конкурстарға, олимпиадалар мен пәндік апталарға ерекше ықыласпен қатысушы өрендер көп. Ұстаздың аудандық, облыстық, республикалық және халықаралық олимпиадаларда бақтарын сынап, жүлделі орындарға ие болған шәкірттері аз емес.
Владислав ХРАМОВ,
Кривощеково орта мектебі директорының тәрбие ісі жөніндегі орынбасары.
Шал ақын ауданы.