Soltüstık Казахстан
Статистикаға сүйенсек, біздің қоғамда зейнет жасына жақындаған азаматтарға жұмыс табу қиын. Жұмыс берушілердің көпшілігі қарттарды алғысы келмейтіндіктен, олар еңбек шартынсыз, яғни бейресми түрде істеуге мәжбүр. Алайда елімізде «Күміс жас» арнайы жобасы жүзеге асырылғалы бері зейнет жасына тақаған жұмыссыз азаматтар жобаның игілігін көруде.
Облыстық жұмыспен қамтуды үйлестіру және әлеуметтік бағдарламалар басқармасының басшысы Ринат Елжасовтың айтуынша, «Күміс жас» жобасы облыста табысты жүзеге асырылып жатыр. Өткен жылы жоба аясында 266 адам, биыл 332 жұмыс іздеуші еңбекпен қамтылған. Біліктілігі төмен мамандықтарды қоспағанда Петропавл қаласында 73 адам әртүрлі қызмет салаларында жұмыс істеп, нәпақасын тауып жүр. Жалпы аталған жоба іске асқалы бері өңірімізде зейнетке жақындаған адамдардың жұмыспен қамтылу деңгейі артқаны байқалады.
2022 жылы іске қосылған «Күміс жас» жобасына зейнеткерлік жасқа дейінгі адамдар қатыса алады. Ал соңғы өзгеріске сәйкес, яғни 2023 жылдан бастап аталған жобаға 50 жастан асқан кез келген адам қатысу мүмкін- дігіне ие.
«Күміс жас» жобасы – зейнеткерлік жасқа дейінгі жұмыс істемейтін адамдардың экономикалық белсенділігін арттыруға және тәжірибесін жас ұрпаққа беруді ғана емес, сонымен қатар кәсіпкерлік субъектілерді қолдауды қамтамасыз етеді. Мәселен, жұмыс беруші жұмыссыздарды 3 жылға дейінгі мерзімге жұмысқа қабылдайды, ал мемлекет осы уақыт ішінде жұмыс берушінің жұмыссызға белгілеген жалақысының 60-70 пайызын субсидиялайды. Сондықтан аталған жобаның кәсіпкерлік субъектілерін де, жұмыс берушілерді де, екі қолға бір күрек табуы қиын егде жастағы адамдарды да қолдауда маңызы зор.
– Еңбек шарты Еңбек кодексіне сәйкес жасалады. Субсидиялар мөлшері пайдаланылмаған еңбек демалысы үшін өтемақыны ескере отырып заңнамаға сәйкес есептеледі. Жобаға қатысушылар жұмыс берушілерден түскен өтінімдерге сәйкес кәсіпорындарға және жекеменшік нысанындағы ұйымдарға 3 жылға дейінгі мерзімге жұмысқа қабылданады, – дейді облыстық жұмыспен қамтуды үйлестіру және әлеуметтік бағдарламалар басқармасының басшысы Ринат Елжасов.
«Күміс жас» жобасының игілігін көріп жүргендердің бірі – 61 жастағы Уәлиханов ауданының тұрғыны Қажымұрат Мұқашов. Ұзақ уақыт бойы жұмыс іздеген ол биыл жергілікті «Мансап» орталығына жүгінген. Оны жоба аясында сауда саласындағы жеке кәсіпкер жүк көлігінің жүргізушісі қылып жұмысқа қабылдапты.
– Мен көңілімнен шығатын, ыңғайлы жұмыс тапқаныма қуанамын. Жұмыссыз жүрген замандастарыма осы бағдарламаға қатысуға кеңес берер едім. Біз секілді зейнет жасына жеткен адамдарға пайдасын тигізіп жатқан жобаны дайындаған мемлекетке алғысым зор, – дейді Қажымұрат Мұқашов.
Тайынша қаласының тұрғыны Ғазизулла Қоздыбаевтың айтуынша, аталған жоба алпыстың асқарына шыққан азаматқа өзін сұранысқа ие қызметкер ретінде сезінуге мүмкіндік берген.
– Соңғы жылдары аудан көлемінде жалақысы мардымды жұмыс таба алмай жүріп қалдым. Осындай бағдарлама бар екенін естіген соң, «Мансап» орталығына жүгіндім. Мамандардың нұсқауымен «Quality» жеке кәсіпкерлігіне моторист-машинист ретінде жұмысқа орналастым. Жұмыс қиын емес, өзіме ұнайды. Бастысы, еңбек етуге ерінбеу керек, – дейді ол.
Екі қолға бір күрек іздеген егде жастағы азаматтар «Күміс жас» жобасына қатысу үшін тұрғылықты жері бойынша «Мансап» орталығына жүгінеді немесе «Электрондық еңбек биржасы» порталында, я болмаса «Электрондық үкімет» порталы арқылы өтінім бере алады. Өтініш берген кезде өзімен бірге жеке куәлігі мен еңбек кітапшасын да ала барғаны жөн.
Гүлфайруз ТӨРЕМҰРАТОВА,
«Soltüstık Qazaqstan».