ЖОЛ МӘСЕЛЕСІ ШЕШІЛДІ

Халқымыз “Бір жол бар жақын, жақын да болса алыс. Бір жол бар алыс, алыс та болса жақын” деп бекер айтпаған. Мұның бір мағына­сын қазіргі жолдардың сапасымен байланыстыруға болатын сыңайлы. Яғни, жол сапалы жөнделсе, жо­лаушы жолдың азабын тартпай, айшылық алыс жерлерге тез жете алады. Ал керісінше жолдың сапасы сын көтермеген жағдайда жүргізу­шілерді әбден әбігерге салады. 

Менің айтпағым, көп жыл бойы Саумалкөл – Қаратал бағытындағы аудандық маңызы бар жолдың азабы қараталдықтарды шар­шатқаны баршаға аян. Кеңес заманында салынған асфальт жолдың тозығы жетіп, аудан орталығына қатынау қиындай түскен болатын. Жыл сайын қаңтар-ақпан айларында барлық деңгейдегі әкімдердің тұрғындар алдындағы есепті кездесулерінде жол мәселесі күн тәртібінен түспеуші еді. Алайда, бұл мәселе қаражаттың бөлінбеуі салдарынан кейінге шегеріле бер­ді. Ауылымыздың ақсақалы Айтмағанбет Дауылбаев аудан әкімінің есепті кездесуінде жол мәсе­лесін бірінші болып көтеретін. Ақыры не керек, ол Парламент сенатының де­путаты Ерік Сұлтановтың атына хат жазып, жылдар бойы шешімін таппай келе жатқан Саумалкөл – Қаратал бағытындағы жолдың жөнделуіне қаражат бөлуге ықпал етуін сұрады. Арада көп уақыт өт­пей-ақ жобалық-сметалық құжат әзірленіп, Өңірлерді дамытудың 2020 жылға дейінгі бағдарламасы аясында “Саумалкөл – Новоукраинка – Қаратал – Казанка” бағытындағы жолды жөндеуге бюджеттен 1 млрд. 288 млн. теңге қаржы бөлінді. 

Шілде айынан бастап жолымыз­ды жөндеу жұмыстары қарқын ала бастады. Қаратал мен Саумалкөл­дің арасындағы жолға асфальт тө­се­луде. Бүгінгі күні жол жөндеу жұмыстары аяқталуға да жақын. Қаратал ауылының тұрғын­дары осы жолмен аудан орталы­ғына қатынауда. Бұрындары шұ­рық-тесік жолмен ауданға әрең жететін болсақ, енді, міне, жаңа ас­фальтпен тез арада діттеген жерімізге барып жүрміз.
Біздер жергі­лікті бұқаралық ақпарат құралдары арқылы аудан орталығының да жолдарына асфальт төселіп жат­қаны жайында біліп, қуанудамыз. “Ауыл – ел бесігі” жобасы аясында ауданымызды көркейту бағытында қыруар жұмыстар жүзеге асырылуда. Ауданымыздың орталығы – Саумалкөлдің де ішкі жолдары жөнделуде.
Осындай көңіл орнықтырар жұ­мыстардың жүзеге асып жатқаны барлық саланың керегесін кеңейте түсетіні анық. Ең бастысы, жолдарды көзбояушылық үшін жамаумен шектелмей, сапалы салса екен дейміз.
 

Ақанбек ЖАҚСЫБАЕВ,
Қаратал ауылының тұрғыны.
 Айыртау ауданы.