– Мен жалғызбасты анамын. Үш жылдан бері жұмыссыз отырмын. Атаулы әлеуметтік көмек ала аламын ба?
Ақбота ӘБІЛ,
Баян ауылының тұрғыны
Жамбыл ауданы.
Бұл сұраққа Жамбыл аудандық жұмыспен қамту орталығының маманы Гүлнәр Еримова жауап берді:
– Жамбыл ауданындағы Баян ауылының тұрғыны Ақбота Әбіл өз мәселесімен Архангелка ауылдық округінің әкімдігіне не болмаса жұмыспен қамту орталығына жүгінгені жөн. Егер оның әлеуметтік жағдайы атаулы әлеуметтік көмек алу тәртібіне сәйкес келсе, жұмыспен қамту орталығы оның өтініші мен құжаттарын учаскелік комиссияға береді.
Учаскелік комиссия құжаттар келіп түскеннен кейін жеті жұмыс күні ішінде өтініш берушінің материалдық жағдайын тексеріп, қорытындысын дайындайды.
Жұмыспен қамту орталығы алынған құжаттар пакеті мен учаскелік комиссияның қорытындысы негізінде көрсетілетін атаулы әлеуметтік көмек түрін айқындайды. Атаулы әлеуметтік көмек тағайындауға жүгінген адамның тоқсандық жиынтық табысы есептеледі. Атаулы әлеуметтік көмек тағайындау туралы шешім жобасы дайындалып, жұмыспен қамту орталығы маманының және басшысының ЭЦҚ-сымен куәландырылады. Жұмыспен қамту орталығы электронды түрдегі шешім жобасын уәкілетті органға жібереді.
Уәкілетті орган мәліметтердің толықтығын және дәйектілігін, таңдалған көмек түрінің дұрыстығын, тағайындау (тағайындаудан бас тарту) туралы шешімді тексереді. Ал нақты шешімді өтініш иесіне жұмыспен қамту орталығының мамандары немесе әкім хабарлайды.