Мағжан Жұмабаев ауданына жұмыс сапары барысында облыс әкімі Ғауез Нұрмұхамбетов ауыл шаруашылығы саласындағы жобалармен танысты.
Алдымен Ғауез Торсанұлы «СК Агро-2050» серіктестігіне қарасты тауарлы-сүт фермасының құрылысын аралап көрді. Жоба құны – 8 млрд. теңге. Ферма елдегі ірі қараға арналған ең көлемді кешендердің бірі болмақ. Құрылыс жұмыстары аяқталғаннан кейін мұнда заманауи қондырғылар орнатылады. Жаңа сауу аппараты бір уақытта 100 сиырды сауады деп жоспарлануда. Жалпы фермада 3600 бас сауын сиыр бағылатын болады. Алдағы бірнеше жыл ішінде шаруашылық басшысы қара малдың санын 12 мыңға дейін жеткізуді көздеп отыр. 200 бас сүтті сиыр қазан айында Эстония мен Украинадан жеткізіледі деп күтілуде.
Сапар барысында өңір басшысы жергілікті диқандармен жүздесіп, астық жинау науқанының жай-жапсарымен танысты. Тиімді агротехнологиялық шаралардың арқасында биыл шаруалар мол өнімге қол жеткізіп отыр. Бүгінде диқандар астықтың жартысынан астамын (егіс алқабының 55 пайызын) орып үлгерген. 2,5 млн. тонна астық қамбаға құйылыпты. Орташа өнімділік гектарынан 16,9 центнерден айналуда.
«Ауыл шаруашылығы кәсіпорындарындағы мамандардың еңбек жағдайына ерекше көңіл бөлінуде. Техника жаңартылып, еңбек ету мен ауылды жерде өмір сүруге қолайлы жағдайлар жасалуда. Қарапайым еңбек адамдарын қолдау – біздің жұмысымыздың басым бағыттарының бірі», – деді өңір басшысы.
Аудан диқандары салаға заманауи технологияларды белсенді түрде енгізуде. Егіс алқаптарының 75 пайызында ауа райын бақылау жүйелері, топырақты талдауға арналған датчиктер мен жасанды интеллект элементтері қолданылып жатыр. Бұл жұмыстың дәлдігін арттырып, шығындарды азайтуға мүмкіндік береді.
«СК Агро-2050» серіктестігінің бас агрономы Хафиз Амановтың сөзінше, шаруашылық алқаптарында бүгінде жиырмадан астам техника жұмыс істеуде.
«Механизаторлар бірнеше алқапта бөлініп еңбек етуде. Қамба астыққа толар күн жақын. Жоспарлы жұмысты уақытында аяқтаймыз деп отырмыз. Ылғалдылық көрсеткіші 18-20 пайыз аралығында. Астықты сақтау орындарына жөнелту жұмыстары да ойдағыдай атқарылуда», – дейді Хафиз Аманов.
Еркебұлан ЕЛУБАЕВ,
журналист.
Мағжан Жұмабаев ауданы.