Солтүстікқазақстандық еркін күрес балуаны Нұрқожа Қайпанов Амманда (Иордания) өтіп жатқан Азия чемпионатында жеңіске жетті. Осылайша жерлесіміз еркін күрестен үш дүркін Азия чемпионы атанды. Жеңімпазды әлеуметтік желіде облыс әкімі Ғауез Нұрмұхамбетов құттықтады.
«Алдағы уақытта жоспарлары орындалып, Олимпиада ойындарына қатысып, еліміздің намысын қорғауға жазсын. Нұрқожа мен бапкерлерін, спорт сүйер қауымды алтын жүлдемен құттықтаймын. Жеңісті күндер алда болсын!» – деп жазды өңір басшысы Ғауез Нұрмұхамбетов.
74 келіге дейінгі салмақтың шешуші белдесуінде Нұрқожа Қайпанов қырғызстандық Орозбек Токтомамбетовтен басым түсті. Күрес 2:1 есебімен біздің балуанның пайдасына аяқталды. Нұрқожа Қайпанов өткен жылы олимпиадалық емес салмақ дәрежесіндегі балуандар арасындағы әлем чемпионатында 70 келіде үздік атанған. Содан кейін ол 74 келіге дейінгі салмаққа ауысып, өзін жақсы қырынан көрсетуде.
Рабиға ЕРАЛЫ,
«Soltüstık Qazaqstan».