Туу туралы куәлігімді жоғалтып алдым. Оны қайта жасатуға бола ма, ол үшін қандай құзырлы органға жүгіну қажет?
Алмагүл КӘРІМОВА.
Шал ақын ауданы.
Оқырман сауалына облыстық әділет департаментінің азаматтық хал актілерін тіркеу және апостилдеу бойынша жұмысты ұйымдастыру бөлімінің жетекші маманы Қымбат Қошанова жауап береді.
Қайталама куәліктерді беру тәртібі Әділет министрінің бұйрығымен бекітілген “Азаматтық хал актілерін мемлекеттік тіркеуді, азаматтық хал актілері жазбаларына өзгерістер енгізуді, қалпына келтіруді, жоюды ұйымдастыру” ережесімен реттеледі. Бастапқы куәлік жоғалған немесе пайдалануға жарамсыз болған жағдайда азаматтық хал актісін тіркеу туралы куәлік қайтадан беріледі. Мемлекеттік қызмет стандартына сәйкес қайталама куәліктер беру халыққа қызмет көрсету орталықтары арқылы аумақтық әділет органдарында жүргізіледі. Қайталап куәлік алу үшін азамат өзінің тұрғылықты жері бойынша халыққа қызмет көрсету орталығына жүгініп, өтініш беруі қажет. Өзімен бірге жеке басын куәландыратын құжаты болуы тиіс.
Егер де халыққа қызмет көрсету орталығына азаматтың өзі келе алмаса, онда оның өкілі нотариалды куәландырылған сенімхатты ұсынуы тиіс. Қайталама куәлік бергені үшін мемлекеттік баж алынады. Салық кодексіне сәйкес мемлекеттік баж айлық есептік көрсеткіштің 100 пайызын құрайды. Ал егер азаматтық хал актілерін тіркеу кезінде қателіктер кетсе, онда арыз иесі мемлекеттік баж салығын төлемейді.
Мемлекеттік қызметті көрсету мерзіміне тоқталар болсақ, азаматтық хал актілері 2008 жылдан кейін тіркелсе, электронды түрдегі анықтамалар 1 жұмыс күні ішінде беріледі. “АХАЖ” тіркеу пункті ақпараттық жүйесінде акт жазбаларының электронды нұсқасы болған жағдайда көрсетілетін қызмет алушы қажетті құжатқа 3 жұмыс күні ішінде қол жеткізеді. Ал тіркеуші органның мұрағатында азаматтық хал актісі болған жағдайда көрсетілетін қызмет алушыға дайын құжаттар 5 жұмыс күні ішінде беріледі.