Көптің көзіне түспей-ақ үлкен ерліктер жасап жүрген құтқарушылар бейбіт күннің батырлары деген атаққа әбден лайық. Осындай мамандардың бірі – облыстық төтенше жағдайлар жөніндегі департаменттің жедел-құтқару жасағының бөлім бастығы-құтқарушы Нұрболат Айсин.
– Жұмыс барысында тәуекелге бел буатын сәттер жиі кездеседі. Өзімізге жүктелген міндетті адал атқаруға тырысамыз. Төтенше жағдай кезінде адам өмірін құтқарып қалсақ, бізге бұдан артық қуаныш жоқ, – дейді құтқарушы.
Нұрболат Шал ақын ауданындағы Садовка ауылында дүниеге келген. Ақмола облысының орталығындағы “Көкше” академиясын заңгер мамандығы бойынша бітірген ол Нұр-Сұлтан қаласындағы №3660 әскери бөлімде Отан алдындағы борышын өтейді. Петропавлға оралғаннан кейін Қазақстан Республикасы Ұлттық қауіпсіздік комитетінің №2032 шекара қызметі бөлімшесінде еңбек жолын бастайды. Ал 2015 жылы облыстық төтенше жағдайлар жөніндегі департаментте жаңадан құрылған жедел-құтқару жасағына бас құтқарушы болып жұмысқа орналасады. Өз қызметіне деген жауапкершілікпен көзге түсе білген маман кезекшідиспетчерлік бөлімнің бастығы лауазымына дейін көтерілді.
Бүгіндері Нұрболат Құрмашкеұлы жетекшілік ететін бөлімнің құтқарушылары апаттық, іздестіру және құтқару шараларына қатысады. Үстіміздегі жылдың көктемінде тасқын су Уәлиханов ауданындағы Қулыкөл және Қаратал ауылдарына қауіп төндіргені белгілі. Сол кезде жедел-құтқару жасағының құтқарушылары қос ауылдың бір мыңға жуық тұрғынын қауіпсіз жерге көшіру жұмыстарын жүргізіп, көпшіліктің алғысына бөленген болатын. Тәжірибелі мамандардың уақытында қолға алған шараларының нәтижесінде жерлестеріміздің өміріне ешқандай қауіп төнген жоқ. Сондай-ақ, тұрғындардың қораларындағы малы да құтқарылды.
Құтқарушылардың басты міндеті – тұрғындардың тыныш өмірін, тұрмыстағы, өндірістегі қауіпсіздігін қамтамасыз етіп, апаттық жағдайларға жол бермеу. “Жігітке жеті өнер де аз” дегендей, құтқарушылар да сан қырлы болуы тиіс. Жұмыс барысында дәнекерлеуші, электрик, тіпті, фельдшердің жұмысын да атқаруға тура кеп жатады. Сонымен қатар олардың спорттық дайындығы, денсаулығы мықты болуы керек.
Бұл мамандық иелері кезекшілік кезінде пәтер есігін ішінен жауып алған кішкентай балалар мен жалғызбасты қарттарға да көмек қолын созады. Мұндай жағдайда ішке темір есікті бұзып немесе альпинистік құрал-жарақтың көмегімен терезеден кіреді. Апатты жағдайда жапа шеккендерге алғашқы медициналық көмек көрсету қажет болатын жағдайлар да кездеседі. Осындайда адам өміріне араша түсу үшін әрбір құтқарушының медициналық білімінің болуы міндеттеледі. “Жедел жәрдем” көлігі келгенше қажетті ем-дом шараларын жасау құтқарушылардың қолдарынан келеді.
Бүгіндері департаменттің жедел-құтқару жасағында 55 құтқарушы бар. Олардың басым бөлігі жедел-құтқару жасағында, қалғандары Есіл мен Пестрое көлінің жағасында орналасқан құтқару станцияларында шоғырланған. Бұдан бөлек, сүңгуірлер мен кинология бөлімшелері бар. Жасақ құрамындағы қызметкерлердің барлығы өз жұмысын адал, абыроймен атқарып жүр. Тәжірибесі мол құтқарушылар кейінгі келген жас мамандарға білгендерін үйретіп, әрдайым қамқорлық танытады.
Бұған қоса олардан жылдамдық та талап етіледі. Қаланың ішінен шақырту түссе, он минутта сол жерден табылады. Өрт сөндіру немесе “Жедел жәрдем” тобынан да ертерек жетіп, зардап шеккендерге көмектеседі. Көшелердегі көлік кептелісі, қалың түскен қар құтқарушылардың міндетін адал атқаруға кедергі бола алмайды. Жедел-құтқару жасағының арнайы көлігі дауыс зорайтқыш құрылғысымен, сорғы станциясымен, альпинистік жарақтармен, генераторлар, басқа да құралдармен жабдықталады.
– Біз күнделікті жұмысымызда облыстық полиция департаментінің патрульдік топтарымен және қаладағы өрт сөндіру бөлімдерінің жасақтарымен қоян-қолтық жұмыс жүргіземіз. Боранды күні адасқандарды, суға батқандарды іздестіру сияқты қиын сәттерде жігіттердің қасынан табылуға тырысамыз. Қол күші артық етпейді. Құтқарушылардың бойында жауапкершілік, сонымен қатар жүректілік, салқынқандылық пен сабырлылық болуы керек. Себебі, қиын сәтте шұғыл әрі дұрыс шешім қабылдау арқылы ғана ол өзінің де, өзгенің де өмірін сақтап қалады, – дейді Нұрболат Айсин.
Қанат АТАМАНОВ,
“Soltústik Qazaqstan”.
СУРЕТТЕ: Н.Айсин көктемгі су тасқыны кезінде.