Soltüstık Казахстан
Петерфельд ауылындағы Қызылжар-Абай орта мектебінде 230 оқушы білім алады. Оқу ордасының ерекшелігі сол, оқыту мен тәрбие беру жүйесі ұлы ақын Абай Құнанбайұлының педагогикалық идеялары мен принциптері негізінде жүргізіледі.
Былтыр мемлекеттік-жекешелік әріптестік негізінде 1969 жылы салынған ғимаратқа күрделі жөндеу жүргізіліп, білім беру формасы түбегейлі өзгерді. Жаңартылған білім мазмұнымен қоса “қабырғалар оқытады” әдіс-тәсілдері де пайдаланылады. Яғни, интерьер және экстерьер дизайнын дайындау үшін Қазақстанның ең үздік сәулетшілік бюросына тапсырыс берілді. Ашық оқу алаңы, релаксация кабинеті бар. Бастауыш сыныптардың интерактивті алаңына жаңа жабдықтар орнатылды. Қажетті қондырғылармен толық қамтамасыз етілді. Кітапхана барлық пәндер бойынша оқулықтармен, көркем әдебиеттермен, ғылыми-көпшілік туындылармен толыққан.
Бір мыңға жуық ауыл тұрғынының мектепке деген көзқарасы мүлдем өзгерді. Оны әлеуметтік-тәрбиелік, заңнамалық, психологиялық көмек көрсететін орталық ретінде санайды. Психолог, заңгер, әлеуметтік қызметкер жұмыс істейді. Білікті мамандармен кездесулер ұйымдастырылып, денсаулық, жасөспірімдер, отбасы құндылықтары, кәсіпкерлік пен бизнес мәселелері жүйелі түрде талқыланады.
Мектептің жүрегі – мұғалім болғандықтан, осында еңбек ететін 49 ұстазға айрықша талаптар қойылады. Назарбаев зияткерлік мектептерінде сынақтан өткен тәжірибелер қолданылады. Сапалы ғаламтор желісі, заманауи компьютерлер, үздік зертханалық кабинеттер жұмыс істейді. Химия, физика, биология, информатика кабинеттері ең соңғы үлгідегі құрылғылармен жабдықталған. Оқушылар заманауи сандық технологияларды меңгереді. Ұлттық педагогикаға басымдық берілген.
Мектеп философиясы Абайдың “Толық адам” концепциясына сүйенеді. Бұл – сараптаманың барлық түрінен өтіп, Қазақстанда қолдануға ұсынылған тұңғыш және әзірге жалғыз жоба. Ол дайын үлгіге негізделмеген, айрықша жаңа бастама. Бастапқы идеясынан бастап жүзеге асыру үшін ең үздік мамандар тартылды. Баланың физикалық, зияткерлік және рухани үйлесімді дамуына мән бере отырып, Абайдың “Ыстық қайрат, нұрлы ақыл, жылы жүрек” деген пайымы құндылықтар бастауы ретінде алынды. “Ыстық қайрат” бағытында оқушылардың денсаулығына, физикалық дамуына, әл-қуатының өсуіне жағдайлар жасалады. “Нұрлы ақыл” бағытында оқушылардың зияткерлік дамуына, терең білім алуына, дарындылықтың көзін ашуға озық технологиялар қолданылады. Ал, “Жылы жүрек” бағытында отбасы, балабақша және мектептердегі тәлім-тәрбие негіздері ұлттық салт-дәстүрлермен тығыз байланыста жүргізіледі.
Петерфельд елді мекені маңында бірнеше шағын ауыл бар. Олардан қатынап оқитын оқушылар үшін интернат салу жоспарланған. Осылайша, жаңа, ұлттық үлгідегі мектеп қалыптастырып, ауыл мен қала мектебінің айырмашылығын азайту ойластырылған. Бұл жобаны өңірдің басқа жерлерінде жүзеге асыруға дайынбыз.
Бауыржан ТӨЛЕНОВ,
мектеп директоры.
Қызылжар ауданы.