Soltüstık Казахстан
Солтүстік Қазақстан облысының орман шаруашылығы мекемелерінің автопаркі биыл 212 млн. теңгенің жаңа техникаларымен толықты. Жаңа тракторлардың соңғы легін облыс әкімі Құмар Ақсақалов табыстады.
Облыста орман қорының ауданын ұлғайту жұмыстары жылдан-жылға артып келеді. Президент Қасым-Жомарт Тоқаевтың тапсырмасына сәйкес, 2025 жылға дейін елімізде 2 миллиард ағаш егілуі тиіс. Бұл жұмысты қуатты техниканың көмегінсіз атқару мүмкін емес.
Биылдың өзінде теріскей орманшыларына 212 миллион теңгеге 14 трактор, 5 патрульдік автокөлік пен өрт сөндіру қондырғылары сатып алынып, соның нәтижесінде техникамен қамтамасыз етілу көрсеткіші 14 пайызға жақсарды.
– Бұл жұмыстардың барлығы орманды сақтауға және көбейтуге бағытталған. Соңғы 5 жылда облыста 16 млн. көшет отырғызылды. Бұл кесілген ағаштардан екі есе көп. Бұнымен тоқтап қалмай, жұмысты жалғастыра беру керек. Алдағы 5 жылда облысымызда 100 млн. ағаш көшетін егуді жоспарлап отырмыз, – деді Құмар Іргебайұлы орман шаруашылығы мекемелерінің өкілдеріне жаңа техникалардың кілттерін табыстау рәсімінде.
Сатып алынған тракторлар отандық өнім саналады, сапасы жоғары. Негізгі бөлшектері Белоруссияда жасалып, Қостанайдағы зауытта құрастырылған. Әрбіреуінің бағасы 8 миллион теңге шамасында. Облыстық табиғи ресурстар және табиғатты пайдалануды реттеу басқармасының басшысы Бейбіт Исмановтың айтуынша, жаңа техникалардың арқасында орман шаруашылығы қызметкерлерінің жұмысы жеңілдей түспек.
Әділет БАҒЛАНҰЛЫ,
“Soltüstık Qazaqstan”.