Soltüstık Казахстан
Сахна – қасиетті орын. Онда сан алуан өнер түрлері тоғысады. Тарих та, керуен-керуен көш те, сынаптай сырғыған уақыт та, тіршілік пен өмір де осынау киелі мекенге өз бедерін салады. Тәуелсіздікке қол жеткізгеннен кейін қазақ мәдениеті үшін жаңа кезең басталды. Соңғы жылдары республикада ұлттық мәдениет пен өнердің озық үлгілерін әлемдік айналымға шығару, сол арқылы Дүниежүзі қауымдастығына танылу жолдары қарастырылуда. Өнер мен мәдениет саласына қызығушылық танытатын жастардың саны да артуда. Олардың қатарына Айыртау ауданының тумасы Жәния Қарабатырды қосуға болады.
Ол кішкентай кезінен ән шырқағанды ұнатқан. Қызының шығармашылыққа бейім екенін байқаған анасы оны музыка мектебіне береді. 11-сыныпта оқып жүргенде Жәния болашақта қандай мамандық таңдау керектігін ойлана бастайды. Жас талапкер өнер мен мәдениеттің ордасы Алматы қаласындағы Жүсіпбек Елебеков атындағы республикалық эстрада-цирк колледжінің эстрадалық вокал бөліміне оқуға түсті.
2020 жылы Жәния колледжді үздік бітіріп, Темірбек Жүргенов атындағы Қазақ ұлттық өнер академиясына қабылданады. Қазір бойжеткен осы оқу орнының екінші курсында оқып жүр. Биылғы жылдың қараша айында Жәния Арменияда өткен “Арменияның алтын дауысы: 2021-2022” халықаралық байқауына қатысты.
– Байқауға Қазақстан, Латвия, Литва, АҚШ, Италия, Украина, Беларусь, Ресей және басқа елдерден әртүрлі жастағы 600-ден астам вокалист қатысты. Бұл байқауда мен “Авторлық ән” (Гүлсім Мырзабекованың “Қазағым-ай”) және “Әлемдік хит” (Кристина Агилераның “Hurt”) аталымдары бойынша бас жүлдені жеңіп алдым. Алдағы уақытта өзімнің жеке альбомымды шығарып, Қазақстанға ғана емес, барлық ТМД елдеріне танылғым келеді. Алдыма әлемдік деңгейдегі байқауларға қатыссам деген мақсат қойдым, – дейді бойжеткен.
Шыны керек, жас дарындардың көбі көпшіліктің алдына шығудан жүрексініп жатады. Сахнаға шыққанда қатты қобалжығаннан микрофонның қайда қалғанын білмейтіндер де бар. Жәнияның айтуынша, сахнаға неғұрлым көбірек шыққан сайын қорқыныш та соғұрлым азаяды.
– Мен көбінесе поп, соул және патриоттық әндер орындаймын. Репертуарымда 100-ден астам ән бар. Біразы шетел тілінде орындалады. Сүйікті әншілерім Назима, Бейонсе және Рианна. Бос уақытымда кітап оқып, табиғатта серуендегенді ұнатамын. Медеуге жиі барып тұрамын, – дейді талантты жас.
Ғылым-білім, мәдениет пен өнер саласындағы талантты жастарды қолдауда Қазақстан Республикасы Тұңғыш Президенті қоры орасан зор жұмыс атқарып отыр. Бүгінде қор жанында шығармашыл жастар кеңесі жұмыс істейді. Кеңестің құрамына республикамыздағы сәулетшілер, кинематографистер, дизайнерлер, жазушылар, суретшілер және басқа да шығармашылық одақтардың өкілдері кіреді. Кеңес түрлі көрмелер, байқаулар, фестивальдар мен концерттер, көрермендер конференцияларын ұйымдастырады. Мемлекеттік грант бойынша білім алып жүрген Жәния да қор өкілдері ұйымдастыратын шаралардан қалыс қалмауға тырысады. “Түрлі өнер иелерінің бастарын тоғыстырған қордың жұмыстарына атсалысу арқылы өзімді-өзім жетілдірудемін”, – дейді ол.
Рабиға ЕРАЛЫ,
“Soltüstık Qazaqstan”.