Soltüstık Казахстан
Біздің еліміз қиын кезеңді бастан өткерді. Қаншама отбасы еңіреп қалды, Әсем қала – Алматымыздың, өзге де шаһарларымыздың келбетіне нұқсан келді. Бейбітшілігімізден, елімізден, шыны керек, Тәуелсіздігімізден айырылып қала жаздадық. Мемлекет басшысының сын сағатта абдырамай, жағдайды уысынан шығармай дұрыс әрі батыл шешім қабылдауының арқасында қатерден аман қалдық. Ендігі міндетіміз – ел болып бірігіп, Президент қойған межеге жету. Негізгі басымдықтар экономика саласына беріліп отыр. Біз қуатты ел боламыз десек өндірісті дамытуымыз керек. Өзіміздің мүмкіндігімізді пайдаланып елге қажетті өнімді өндіруге кірісуге мүдделіміз.
Парламент Мәжілісінің отырысында сөйлеген сөзінде Қасым-Жомарт Тоқаев экономиканы әртараптандыру – күрделі міндет екенін атап өтті. “Әртараптандыру болмаса, азаматтарымыздың әл-ауқатын арттырып, тұрақты жұмыс орындарын ашу мүмкін емес. Бұл жұмыстың басты бағыты – өңдеу өнеркәсібін дамыту. Дегенмен ел экономикасындағы өңдеу өнеркәсібінің үлесі айтарлықтай өсті деп айтуға келмейді. Біз әлі күнге дейін бірқатар өнім түрінен импортқа тәуелдіміз. Жыл өткен сайын еліміздің төлем балансында өткір тапшылық байқалуда. Алюминийден, мыстан жасалған дайын бұйымдар және машина жасау саласына қажетті жабдықтар әлі күнге дейін шетелден әкелінеді. 2020 жылдың қорытындысы бойынша тек мұнай-газ және тау-кен машина жасау саласының импорты 4 миллиард доллардан асты”, – деді Мемлекет басшысы. Бұдан шығатын қорытынды мынау: біз әлі күнге дейін шикізат қана өндіретін ел болып қалып отырмыз, елімізден шығатын азық-түлік өз нарығымызды қамтамасыз етуге жетпейді, жеңіл өнеркәсіптің даму қарқыны тым баяу. Алдағы уақытта кәсіпкерлерге берілетін бірреттік тегін грант мөлшері 600 мың теңгеден 1200 мың теңгеге дейін өседі. Сонымен қатар ауыл шаруашылығы саласындағы ірі кәсіпорындар мемлекет тарапынан зор қолдауға ие болады. Енді отандық кәсіпкерлерге де жүктелер міндет зор. Олар өз жұмыстарын нарықты жан-жақты зерттеп барып жүргізулері керек. Қолға алынбай келе жатқан кәсіп түрлері ашылса құба-құп.
Қасым-Жомарт Кемелұлы қалыптасқан жағдайға терең талдау жүргізуді тапсырды. “Бұған кейбір адамдар мүдделі ме?” деген сауал тастады. Заңды сұрақ. Иә, бізде, өкінішке қарай, алға жылжушылық болғанымен, кейбір салаларда керісінше жағдай орын алғаны жасырын емес. Оған жең ұшынан жалғасқан жемқорлық та кінәлі. Танысына, туысына қолдау көрсеткен кейбір лауазымды тұлғалардың кесірінен өнеркәсіптің кейбір салалары тоқырауға ұшырады. Ауылда тұратын адам ретінде, бизнес өкілі ретінде айтарым, ең бастысы, қарапайым тұрмысқа қажетті дүниелерді өзіміз шығарсақ, басқаға телмірмес едік. Ол заттың өзіндік құны да төмен болады. Бұл біздің экономикамызға, әлеуметтік жағдайды жақсартуға әсер етеді. Өйткені өндіріс ошағы болса жұмыс орындары ашылады. Елімізде іскер жандар көп, идеясы, ұсынысы бар адамдарды тауып, олардың әлеуетін тиімді пайдалану – мемлекет ұстанған басты бағыттардың бірі болу керек деп ойлаймын.
Президентіміз көп мәселенің бетін ашып берді. Утилизациялық алым да қарапайым халықтың болсын, кәсіпкерлірдің болсын қалтасына түсетін салмақ еді. Жақсы жұмыс істеу үшін жаңа техника керек. Оны сатып алайын десең қымбатшылық қолыңды байлайды. Осындай қажетсіз алымдар – бизнестің өркен жаймауына әсер ететін жағымсыз фактор. Бір айта кетерлігі, біздің облысымызда өндіріс саласы дамып келеді. Шетелдік комбайндар мен техникалар құрастырылып жатыр, тауар тасымалдайтын арнайы вагондар шығарылып жатыр.
Мемлекет басшысы көтерген мәселелерді шешу үшін халықтың пікірімен санасу қажеттігін айтты. Бұл да қарапайым бұқара мен билік арасын жақындастыра түскендей. Президентіміз сөзінің соңында: “Жаңа Қазақстанды бірге құрайық”, – деп ұран тастады. Бұл бәрімізді бірігуге, ел болашағы үшін жұдырықтай жұмылуға шақыруы деп ойлаймын.
Екпін ӘБИЕВ,
“Екпін 2002” жауапкершілігі шектеулі серіктестігінің құрылтайшысы,
Жамбыл ауданы.