Soltüstık Казахстан
Биыл облыс орталығының көшелерін көгалдандыруға 50 млн. теңге жұмсалады. Бұл туралы қалалық мәслихаттың 12-ші сессиясында айтылды.
Жергілікті халық қалаулыларының қатысуымен өткен жиында бірнеше сұрақ қаралды. Оның бірі – шаһарды көгалдандыру мәселесі. Белгілі болғандай, Петропавлда үстіміздегі жылы 486 терек пен шетен көшеттері, саябақтарда 600 метр бұталы қоршаулар отырғызылады. Бұл жұмыстарға коммуналдық кәсіпорындар алдағы уақытта кірісетін болады. Қалалық экономика және бюджеттік жоспарлау бөлімінің басшысы Жасұлан Байқановтың айтуынша, жаңғырту жұмыстары шаһардың саябақтары мен Брусиловский, Жұмабаев, Пушкин көшелерінде жүргізіледі. Бұл мақсатқа 10 млн. теңге қарастырылып отыр.
– Алтынсарин көшесіндегі саябақты қалпына келтіруге 25 млн. теңге бөлінді. Бұл жердің жолы жөнделіп, ағаш орындықтар орнатылады, – деді Жасұлан Байқанов.
Бұған қоса биыл Брусиловский мен Булавский көшелеріндегі 3 гүлзардың құрылысы аяқталып, халық игілігіне тапсырылады. Волочаев көшесінде ашық және Бөкетов көшесі бойына жабық суағарлар салынады. Мұндай жұмыстар былтыр Ойқала, Жұмысшы кенттері мен вокзал маңы алаңында тындырылғанын атап өткен жөн. Олардың жалпы ұзындығы 20 шақырымды құрап отыр. Қала әкімдігі мамандарының мәліметінше, бұл шағынаудандарда шамамен 25 мың адам тұрады.
Қалалық мәслихаттың кезекті сессиясында көпқабатты тұрғын үйлердің аулаларын абаттандыру жұмыстары да талқыланды. Мәселен, 50 млн. теңгеге балаларға арналған 10 ойын алаңқайы орнатылады. Былтыр олардың 60 данасы 125 баспананың ауласында қойылды. Сондай-ақ “Береке” шағынауданындағы Ыбыраев, Ухабов және Досмұхамбетов көшелеріндегі тас жиектері ауыстырылады.