Soltüstık Казахстан
Облыс орталығында пешті дұрыс қолданбау салдарынан екі бала иіс тиіп уланып қалды. Облыстық төтенше жағдайлар департаменті мемлекеттік өрт бақылау басқармасының бастығы Аслан Ахметжановтың айтуынша, оқиға 23 қаңтар күні Петропавлдағы Смирнов көшесіндегі жеке тұрғын үйлердің бірінде орын алған. 7 және 4 жастағы сәбилер бірден облыстық көпсалалы балалар ауруханасына жеткізілді. Қазір жағдайлары орташа, ем алып жатыр.
“Балалардың улануына пеш мұржасын ерте жауып тастау себеп болған. Үйде балалардың жанында 30 жастағы анасы болған, келіншектің жағдайы жаман емес, тұрақты”, – дейді Аслан Ахметжанов.
Жалпы өңірде жыл басталғалы 37 өрт оқиғасы тіркелді. Өткен жылы орын алған оқыс оқиғалардың салдарынан бір адам мерт болды. Сондай-ақ биыл 6 адам өртте қаза тапты. 2 адам түрлі дене жарақатын алды. 4 адам иіс тиіп уланды, олардың біреуі қайтыс болды.
Өрт жағдайларының көбеюіне байланысты өңірде 14 қаңтардан бастап өрт қауіпсіздігі айлығы басталды. Өртсөндірушілер, полиция қызметкерлері мен жергілікті билік өкілдері үй-үйді аралап, пештердің дұрыстығын тексеріп жүр. Тұрғындарға қауіпсіздік шаралары туралы ақпарат берілуде.
Ақерке ДӘУРЕНБЕКҚЫЗЫ,
“Soltüstık Qazaqstan”.