Soltüstık Казахстан
Облыс аумағында ауыр және аса ауыр қылмыстар санының тіркелуі 27,6 пайызға төмендеді. Бұл туралы облыстық полиция департаментінде қаңтар айының қорытындысы бойынша өткен жедел кеңесте айтылды. Кеңес барысында тергеу және жедел жұмыс, есірткі қылмысына қарсы іс-қимыл, полиция қызметкерлерінің дене шынықтыру және әлеуметтік-құқықтық дайындығы қаралды.
Облыстық полиция департаментінің бастығы, полиция полковнигі Айдын Қабдұлдинов жиналғандар назарын кейбір түйінді мәселелерге аударды. Интернет-алаяқтық фактілерінің өсуі, синтетикалық есірткілердің көп таралуы да маңызды проблемалардың қатарында. Криминалдық полиция басқармасының бастығы, полиция подполковнигі Марат Жұмалиев киберқылмыстарға қарсы іс-қимыл бағдарламасы аясында Петропавл қалалық полиция басқармасында желілік қылмыстарды тергеу және ашу жөніндегі “Киберпол” мамандандырылған жедел-тергеу тобы құрылғанын атап өтті. Қалалық басқарма басшылығына аталған топқа қолдау көрсетіп, осы жобаны нәтижелі іске асыру тапсырылды.
Есірткі қылмысымен күрес те күн тәртібінен түскен емес. Есірткі қылмысына қарсы іс-қимыл басқармасының бастығы, полиция подполковнигі Иван Терзиди еліміздің басқа өңірлерімен бірлесіп жүргізілген жұмыстың нәтижелері туралы айтты. Осы жылдың алғашқы айында облыс полицейлері есірткі сатқан веб-ресурстарды бұғаттау үшін Индустрия және инфрқұрылымдық даму министрлігіне 31 сілтеме жіберген. Жастар арасында 42 профилактикалық іс-шара өткізіліп, оларға 3 мыңнан астам жоғары сынып оқушылары, колледждер мен жоғары оқу орындарының студенттері қатысқан.
Нашақорлықтың алдын алу жұмыстарының маңыздылығын полиция департаментінің бастығы Айдын Қабдұлдинов та атап кетті. Ол проблемалық мәселелерді облыс әкімі жанындағы ведомствоаралық комиссия деңгейінде шешу үшін мүдделі органдармен өзара іс-қимылды күшейтуді тапсырды. Жедел кеңес соңында жеке құрамға жұмыстың тиімділігін арттыруға және жалпы тәртібін нығайтуға бағытталған нақты тапсырмалар берілді.
Ерлан МАХМЕТОВ,
облыстық полиция департаменті ішкі және сыртқы коммуникациялар бөлімінің бас маманы.