Soltüstık Казахстан
С.Мұқанов атындағы облыстық ғылыми-әмбебап кітапханада 8 наурыз – Халықаралық әйелдер күніне арналған “Шын көңілден” атты мерекелік іс-шара өтті. Оны облыстық ардагерлер кеңесі ұйымдастырды.
Шарада аға буын өкілдері нәзік жандарды мерекелерімен құттықтап, Отанның ұйытқысына, отбасының берекесіне айналған ақ жаулықты аналарға мықты денсаулық, бақыт пен шаттық тіледі.
Кеште ардагер ұстаздар – Қымбат Исманова, Айгүл Сарбасова, Валентина Русина, Аққайың ауданының Астрахан ауылындағы бастауыш ардагерлер ұйымының төрайымы Светлана Қасымова мен Тайынша аудандық ардагерлер ұйымын он жылдан аса басқарған еңбек ардагері Нина Поповаға құрмет көрсетілді. Мерекені ұйымдастырушылар ардақты аналардың иықтарына ақ орамал жауып, гүл шоқтарын сыйлады.
Ардақты жандарды есімдері өңірімізге белгілі өнер иелері жүректі тербетер көркем әуендерімен құттықтады. Өнер көрсеткендердің қатарында Дәмеш Құрманкина, Біржан Есжанов, Алма Банных, Мұрат Бекжанов, Юлия Стадухина және X Factor музыкалық жобасының жеңімпазы Махамбет Әбілда болды.
Рабиға ЕРАЛЫ,
“Soltüstık Qazaqstan”.