Soltüstık Казахстан
Алаштың ардақтысы, ақын Мағжан Жұмабаевтың туғанына 130 жыл толуына орай Солтүстік Қазақстан облыстық тарихи-өлкетану музейінде “Ұлтын сүйген ұлы жүрек – Мағжан” көрмесі салтанатты түрде ашылды.
Мағжан ақынның шығармашылығы сан алуан және көпқырлы. Ол орыс, араб, парсы, сонымен қатар ежелгі түркі тілдерін еркін меңгерген. Ақын Уфадағы “Ғалия” медресесін тамамдап, Омбы мұғалімдер семинариясын алтын медальмен, Мәскеудегі Жоғарғы әдебиет-көркемөнер институтын бітірді.
Көрме сөрелеріне ақынның отбасылық альбомынан суреттер, Жұмабаев әулетінің шежіресі, өмірі мен шығармашылығын сипаттайтын құжаттар мен куәліктердің көшірмелері, жеке заттары қойылды, олардың қатарында Мағжанның келіні – Бибізайыпқа сыйлаған кесесін, жайнамазын, 1923 жылы Шыққан “Избранное” кітабын ерекше атап өтуге болады. Жиналғандар назарына Жұмабаевтар әулетінің күнделікті тұрмыста пайдаланған ыдыс-аяқтары, қытай фарфорынан жасалынған табағы көрсетілді. Алаштың ардақты ұлының әр жылдары шыққан кітаптары, ол жайлы жазылған мақалалар, “Мағжан” журналы және “Мағжан оқулары” байқауының суреттері келушілерді қызықтыра түсті.
Солтүстік Қазақстан облыстық музей бірлестігінің директоры Гүлнар Мұқышева шараның мақсатына кеңінен тоқталды. Ақынның ағасы – Әбәмүслімнің немересі Марат Мүслімов Жұмабаевтар әулетінің өмір өткелдерінен ақпарат беріп, көрмені ұйымдастырушыларға алғысын білдірді.
Содан кейін сөз алған М.Жұмабаев атындағы жоғарғы колледж директорының орынбасары Әсем Марланқызы, М.Қозыбаев атындағы Солтүстік Қазақстан университетінің профессоры Жанар Таласбаева, М.Жұмабаев музейінің директоры Айгүл Жүніспаева ақынның шығармашылығы мен артында қалған құнды мұралары туралы айтты.
Қазақстан Жазушылар одағының мүшелері Аманжол Зағыпар мен Күлайхан Рахмет, Қожаберген жырау атындағы №6 орта мектептің мұғалімі Сара Қалиақбарқызы өздерінің Мағжан Жұмабаевқа арнаған өлеңдерін нақышына келтіріп оқып берді. Ақан сері атындағы облыстық филармонияның әншісі Біржан Есжанов орындаған “Япыр-ай”, Ғалымжан Нұрпейісов шырқаған “Жұлдызды жүзік” әндерін жұртшылық жылы қабылдады.
Самрат ҚҰСКЕНОВ,
облыстық тарихи-өлкетану музейінің қызметкері.