Soltüstık Казахстан
Көктемде Аққайың ауданындағы Тереңкөлде балық қырылған болатын. Мамандар мән-жайды анықтау үшін балықтың өлексесі мен су сынамасын алған. Жүргізілген сараптамаға сәйкес, ведомствоаралық жұмыс тобы балықтың неден қырылғанын анықтады.
Облыстық экология департаменті баспасөз қызметінің хабарлауынша, Тереңкөл көлінің таяз учаскелері түбіне дейін қатып, соның салдарынан балық қырылып қалған. Қыста су айдындарының қату тереңдігі 1,0-1,5 метрге жетіпті.
Осы ретте мамандар көлді жалға алушыға су айдынының гидрохимиялық режімін жақсарту үшін тұрақты мониторинг жүргізу, артық өсімдіктерді шабу және аэрация жүргізу бойынша мелиоративтік жұмыстар жүргізуді ұсынды. Егер мелиорация жүргізу мүмкін болмаса, салалық министрліктің тиісті бұйрығымен бекітілген мелиорациялық балық аулауды жүргізу қажет еді. Тиісті жұмыстарды уақтылы орындамаған кәсіпкердің айыбы айқын. Сондықтан ол жануарлар дүниесін қорғау, өсімін молайту және пайдалану туралы заңнаманы бұзу салдарынан келген шығынды өтеуі тиіс.
Жеңіс ЕРЕЖЕП,
М.Қозыбаев атындағы СҚУ-дың студенті.