Soltüstık Казахстан
Петропавлда елдің бүтіндігін бұзуды сұрап, ұлтаралық алауыздық тудырған қала тұрғыны 3 жылға бас бостандығынан айырылды.
Петропавл қалалық соты Қылмыстық кодекстің 180-бабы 2-бөлігі “Телекоммуникация желілерін пайдалана отырып, Қазақстан Республикасының біртұтастығын, оның аумағына қол сұғылмауын және бөлінбеуін бұзуды насихаттау” бойынша С.-ға қатысты қылмыстық істі қарады.
“Петропавл тұрғыны 2021 жылғы 6 қыркүйек күні шамамен сағат 22:00-де әпкесінің ұялы телефонын пайдалана отырып, бейнебайланыс арқылы әлемнің түкпір-түкпірінен пайдаланушылардың анонимді қарым-қатынасына арналған “Чат Рулетка” қосымшасына кірген. Кездейсоқ қосылу нәтижесінде бұрын таныс емес ер адаммен онлайн әңгімелескен. “Чат Рулетка” қосымшасындағы бейнебайланыс арқылы әңгімелесу барысында С. Солтүстік Қазақстан облысы Петропавл қаласын Ресей Федерациясының құрамына алуды өтіне бастаған. Ер адам әңгімені жазып алып, сол күні жазбаны “YouTube” бейнехостингінде жариялады”, – делінген баспасөз хабарламасында.
Прокурор С.-ны 6 жылға бас бостандығынан айыруды сұрады. Сотталушы кінәсін ішінара мойындады. Айыпталушының кінәсі толық дәлелденді.
Петропавл қалалық соты С.-ның жұбайы 1-топтағы мүгедек екендігін және жас баласының барын ескеріп, оны 3 жылға бас бостандығынан айыру жазасына кесті. Жазасын қылмыстық-атқару жүйесінің орташа қауіпсіздік мекемесінде өтейтін болады.
Алтынай ҚАЗИҚАН.