Soltüstık Казахстан
Облыс полицейлері заңсыз аң аулаған екі браконьерді ұстады. Ауыл тұрғындары лақтайын деп жүрген маралды атып алған.
Патрульдік полиция батальонының қызметкерлері 29 мамыр күні Қызылжар ауданының аумағында құжаттарды тексеру мақсатында Тайынша ауданының 62 жастағы тұрғыны тізгіндеп келе жатқан “Mitsubishi Outlander” автокөлігін тоқтатты. Оның жанында 41 жастағы ауылдасы отырған.
Жүксалғышты тексеру кезінде ішінен жануардың еті табылды. Алғашында ер адамдар оның сиыр еті екенін және Петропавлға сатуға апара жатқанын айтқан. Жедел-тергеу тобының тәжірибелі қызметкерлері олардың сөзіне күмәнданған. Еттің шын мәнінде жабайы аңның, яғни маралдың етіне ұқсайтыны анық байқалып тұрған.
Аталған факті Қазақстан Республикасы Қылмыстық кодексінің 337-бабы “Заңсыз аңшылық” бойынша сотқа дейінгі тергеп-тексерулердің бірыңғай тізілімінде тіркелді.
Күдіктілердің айтуларынша, маралды Тайынша ауданындағы Макашевка ауылынан 15 шақырым жерде атып алған. Олардың бірінің тұрғылықты жерінен еттің бір бөлігі мен “Caesar Guerini” мылтығы тәркіленді. Қару осы іске қатысы бар екінші адамға тіркелген, оның үйінен полицейлер етті мүшелеген орынды тапты.
“Күдіктілерден жауап алу барысында олар жануардың басын, терісін, тұяқтарын лақтырып кеткен орынды көрсетті. Екі ер адам да қамауға алынды. Қазіргі уақытта облыс аумағында қандай да бір аңшылыққа тыйым салынған. Қазақстан Республикасы Қылмыстық кодексінің 337-бабының санкциясымен 3 жылға дейінгі мерзімге бас бостандығынан айыруға дейінгі жаза көзделген”, – дейді Қызылжар аудандық полиция бөлімінің бастығы Әлихан Байқадамов.
Нұрбек БАЕКИН,
облыстық полиция департаменті ішкі және сыртқы коммуникациялар бөлімінің инспекторы.