Soltüstık Казахстан
Жастар стадионында медицина қызметкерлері жеңіл атлетика, дартс, арқан тарту, асық ату және доп лақтырудан сынға түсті. Бұл дода ақхалаттылардың кәсіби мерекесіне арналып ұйымдастырылды.
Спартакиадаға өңіріміздің 11 емдеу мекемесінен келген қызметкерлер қатысты. Олардың бір бөлігі асық атып жарысса, екіншілері доп лақтырудан сынға түсті. Ал эстафетада 2-ші және 3-ші қалалық емхана қызметкерлері мен облыстық жүре пайда болған иммундық тапшылық синдромы профилактикасы және оған қарсы күрес жөніндегі орталық мамандары сайысты. Олар жарыстың шарты бойынша белгіленген қашықтықты еңсеріп, қолдарындағы таяқшаны әріптесіне берулері керек. Тартысты сайыста бірінші болып мәре сызығын 3-ші қалалық емхана өкілдері кесті.
– 400 метр қашықтыққа жүгірдік. Бала күнімнен спортпен айналысқаннан соң ба маған қиын болған жоқ. 3-ші қалалық емханада жұмыс істегеніме 1 жыл болды. Емханада 200-ден астам қызметкер бар. Бұл спартакиядаға спортқа бейімі барлары қатысуда, – дейді №3 қалалық емхананың жалпы тәжірибелік дәрігері Бекзат Әлмұрат.
Облыстық денсаулық сақтау басқармасы басшысының орынбасары Нұржан Тағаниязов бұл дода бірнеше жылдан бері үзбей өткізіліп келе жатқанын айтты. “Біз бұл сайыс арқылы қала дәрігерлері мен ауылдарда жұмыс істеп жатқан мамандардың өзара байланысын нығайтқымыз келді”, – дейді ол.
Облыстық спартакиада қорытындысы бойынша көпбейінді облыстық аурухана командасы жеңіске жетті. Жүлдегерлер кубок және грамотамен марапатталды.
Сәлімхан СӘБИТОВ,
облыстық денсаулық сақтау басқармасының баспасөз хатшысы.