Soltüstık Казахстан
Бүгінгі таңда алаяқтық – қылмыстың ең көп тараған түрі. Бұл қылмыс жәбірленушінің жас мөлшеріне, түріне, қалтасының қалыңдығына қарай түрлене береді. Олардың әдіс-тәсілдері де күн сайын жаңарып отырады. Сондықтан алаяқтардың арбауына түсіп қалып жатқандар өте көп.
Облыстық полиция департаменті криминалдық полиция басқармасы жыл басынан бері интернет-алаяқтық бойынша 342 қылмыстық істі тіркеген. Оның 109-ы “банктен қоңырау шалу” схемасы бойынша жасалған.
Облыстық полиция департаменті криминалдық полиция басқармасы бастығының міндетін атқарушы, полиция подполковнигі Мадияр Хариповтың айтуынша, адамдарды алаяқтардан қорғау үшін алдын алу жұмыстары жүргізіліп отырады. Қаңтар айынан бастап облыс тұрғындарына 42 мың жадынама таратылған. Жергілікті телеарналарда алдау сценарийлері туралы егжей-тегжейлі баяндалған алты бағдарлама көрсетілген. Учаскелік инспекторлар да тұрғындарға алаяқтықтың қауіптілігі туралы ескертіп отырады. Осының арқасында былтырғы жылмен салыстырғанда интернет-алаяқтарға алданып қалу дерегі едәуір төмендеген.
Осы ретте банк қызметкерлері клиенттің қандай да бір қаржылық операцияларды жүргізуін талап ете алмайтынын есте ұстаған абзал. Банктің атынан біреу хабарласса, оның заңдылығын тексеру үшін ресми телефон нөміріне қоңырау шалыңыз. Құпия деректеріңізді бөгде адамдарға бермеңіз. Бөгде адамдардың немесе сізбен келісімшарттық қатынастары жоқ ұйымдардың электрондық поштаға келіп түскен күдікті мәтіндік хабарламаларына жауап бермегеніңіз абзал. Жалпы аялаяқтардың құрбанына айналмас үшін қырағы болу керек.
Ләзиза МЫРЗАНТАЙҚЫЗЫ,
“Soltüstık Qazaqstan”.