Soltüstık Казахстан
“Qyzyljar-ART” орталығында суретші Анна Брыкина қала тұрғындары мен меймандарына арнап “Переливы” сурет көрмесін өткізді. Сөреге қойылған 24 туындының әрқайсысы көрерменнің көңіліне өткен күндердің тәтті елесіндей әсер сыйлады.
“Радуга” балаларды дамыту орталығында бейнелеу өнерінен сабақ беретін Анна Брыкина бұрын қаржы саласында қызмет атқарған. “Жас күнімнен сурет салуға құмар болдым. Кез келген адам бойындағы таланты мен талабын ұштағанда ғана жеңіске жетеді екен. Уақыт өте келе қаржы саласына кездейсоқ келгенімді аңғардым. Бүгінде жаным қалаған іспен айналысудамын”, – дейді ол.
Іс-шара барысында облыстық музей бірлестігінің директоры Гүлнар Мұқышева мен суретші, өлкетанушы, Қазақстан Сәулетшілер одағының мүшесі Александр Листопадний таңғажайып туындыларын тұрғындар назарына ұсынған А.Брыкинаға шығармашылық табыс тілеп, жүрекжарды лебіздерін жеткізді.
Қалалық, облыстық сурет байқауларына қатысты жүрген Анна Владимировна “Golden time talent” британдық байқауының жүлдесінен үміткерлер қатарында.
Ағылшын жазушысы, суретші Джон Рескин “Суретшінің қолы, қиялы және жүрегі бірге жұмыс істесе ғана тамаша сурет шығады”, – деген екен. Көрмеге қойылған туындыларға қарап, А.Брыкинаның қиялы мен талабының үйлесім тапқанын аңғарғандаймыз. Автор табиғаттың сұлулығы мен адами құндылықтарды қылқаламның құдыреті арқылы қағаз бетіне түсіруге тырысқан.
Самрат ҚҰСКЕНОВ,
“Soltüstık Qazaqstan”.