Soltüstık Казахстан
Петропавл қалалық полиция басқармасының ғимараты алдында “Lada Grantа” көлігінің жүргізушісінің дрифт жасап жүрген бейнетүсірілімі әлеуметтік желілерге тарап кетті. Желі қолданушыларының сөзінше, 18 тамыз күні сағат 03:30-да көлік 20 минут бойы ғимарат алдында шыр айналған.
Іздестіру іс-шаралары барысында патрульдік полиция батальонының қызметкерлері автокөлікті Пестрое көлінің маңындағы саяжай учаскелерінің бірінен тапты. Көп ұзамай жүргізуші де ұсталды, ол облыс орталығының 42 жастағы тұрғыны болып шықты. Ер адам көлік тізгінінде өзі болғанын растады. Бұлай жасауына жеке өміріндегі қиыншылықтарға байланысты туындаған эмоциялық күйзеліс себеп болғанын айтты.
Жүргізушіге қатысты Әкімшілік құқық бұзушылық туралы кодекстің 596, 590, 591, 593 және 595-баптары бойынша хаттамалар толтырылды. Бес баптың төртеуі бойынша әкімшілік айыппұл салу көзделген. Ал жолдың қарсы бағытына шыққаны үшін ол 6 айға көлік басқару құқығынан айырылады.
Әсет ҚАНАФИН.