Soltüstık Казахстан
Өңірімізде биылғы жарты жылда 297 мемлекеттік қызметшіге тәртіптік жаза қолданылды. Бұл өткен жылдың сәйкес кезеңімен салыстырғанда 8 пайызға көп. Петропавлда жетім баланың құқығы тапталып, пәтер кезегіндегі орны заңсыз кейінге ысырылған. Тексерістен кейін қалалық әкімдіктің жауапты маманына сөгіс берілді.
Мемлекеттік қызмет істері агенттігі облыстық департаментінің мәліметінше, көктемде Петропавл қаласы әкімдігінің тұрғын үй-коммуналдық шаруашылығы, жолаушылар көлігі және автомобиль жолдары бөліміне облыс орталығының тұрғыны өтінішпен жүгінген. Әйел патронаттық тәрбиедегі 2011 жылы туған баласын мемлекеттік тұрғын үй қорынан пәтер алу кезегіне қоюда қателік кеткенін айтқан.
“Ол патронаттық тәрбиедегі баласын пәтер кезегіне 2018 жылдың ақпан айында қойған. Алайда kezekte.kz порталында кезек артқа сырғып, оның мерзімі 2018 жылдың қыркүйегіне ауыстырылған. Тұрғын кезектегі орынды қалыпқа келтіруін сұрап, тұрғын үй-коммуналдық шаруашылығы жолаушылар көлігі және автомобиль жолдары бөліміне хабарласқан, алайда олар қателікті өздігінен түзетуге асықпапты. Сол себепті әйел департаментке шағымданып, шара қолдануды сұрады”, – деді департамент жанындағы басқарманың бас маманы Дархан Ермеков.
Департамент мамандары тексеріс ұйымдастырып, оның қорытындысы бойынша жетім баланың құқығы қорғалды. Пәтер кезегіндегі орнын қыркүйектен ақпанға ауыстырудың нәтижесінде ол 67 орынға өзгерді. Ал жауапты мемлекеттік қызметші – Петропавл әкімдігінің тұрғын үй-коммуналдық шаруашылығы, жолаушылар көлігі және автомобиль жолдары бөлімінің бас маманы тәртіптік жауапкершілікке тартылып, сөгіс алды. Жалпы өткен жарты жылда тәртіптік жаза қолданылған 297 мемлекеттік қызметшінің 217-сі жергілікті атқару, қалғаны аумақтық мемлекеттік органдарда еңбек еткен. Мемлекеттік қызметші атына кір келтірген үш адам жұмыстан шығарылса, 19 маманға қатаң сөгіс берілді.
“Департамент өткен жарты жылда жоспардан тыс үш тексеріс жүргізді. Тәртіптік жазаның заңсыз қолданылуына қатысты 5 өтініш қаралды. Нәтижесінде 8 адамның құқығының бұзылғаны анықталды. Аталған заңбұзушылықтар негізінде үш ұйғарым енгізіліп, бір хат жолданды. Оның нәтижесінде тәртіптік жаза қолдану ту-ралы 3 актінің күші жойылды, 3 мемлекеттік қызметшінің құқығы қалпына келтірілді”, – дейді Дархан Ермеков.
Департамент бұдан басқа мемлекеттік қызметшілердің жұмыс уақыты режімінің сақталуы бойынша мониторинг жүргізеді. Құқық бұзушылықтарды анықтау үшін арнайы жоспар да бекітілген.
Ақерке ДӘУРЕНБЕКҚЫЗЫ,
“Soltüstık Qazaqstan”.