Soltüstık Казахстан
Жауын-шашын салдарынан егін орағы бір аптаға кешеуілдеуде
Өңірімізде жауын-шашынның салдарынан егін орағы шамамен бір аптаға кешеуілдеп жатыр. Әзірге дәнді және бұршақты дақылдардың тек 27 пайызы ғана жиналды.
Облыстық ауыл шаруашылығы және жер қатынастары басқармасының мәліметінше, тамыз айында 51,9 мм. мөлшерінде жауын жауған. Бұл әдеттегі нормадан 108 пайызға артық. Жоғары ылғалдылық диқандарға піскен астықты жинап алуды қиындатып отыр. Салдарынан 30 тамыздан бастап 6 қыркүйекке дейін егін орағы уақытша тоқтатылды. Жауын-шашын басылғаннан кейін өңір диқандары алқап басына шыққанымен, “Қазгидромет” республикалық мемлекеттік кәсіпорнының мамандары өңірде алдағы күндері тағы да жауын жауатынын хабар-лады.
“Қазіргі уақытта облысымыздағы 919,1 мың гектар дәнді және бұр-шақты алқаптың астығы қамбаға құйылды. Жалпы биыл 3,2 млн. алқапқа дәнді, 960 мың гектар жерге майлы дақыл егілген”, – делінген басқарма берген хабарламада.
Күзгі дала жұмыстарына 13 мың техника жұмылдырылған. Егін орағына 58,9 мың тонна арзандатылған дизель отыны бөлінді.
Өңірде 317 астық кептіргіш бар, олардың өнімділігі сағатына 9,7 мың тонна. Жауын-шашынға байланысты қазіргі уақытта Ауыл шаруашылығы министрлігінде өңірлерге арзан бағамен қосымша дизель отынын бөлу мәселесі қарастырылып жатыр. Жанар-жағармай бидайды кептіруге пайдаланылмақ.
Ақерке ДӘУРЕНБЕКҚЫЗЫ,
“Soltüstık Qazaqstan”.