Soltüstık Казахстан
Астанада “Пренаталды диагностиканың заманауи аспектілері” атты бірінші халықаралық конгресс өтті. Іс-шараға 350-ден астам пренаталды медицина саласының өкілдері, атап айтсақ генетиктер, ультрадыбыстық зерттеу дәрігерлері, акушер-гинекологтар, зертхана диагностикасының мамандары, кардиохирургтар және неонаталды хирургтар қатысты. Олардың қатарында облыстық көпбейінді аурухана жанындағы перинаталдық орталықтың мамандары да болды.
Конгресс барысында ультрадыбыстық диагностика және медициналық-генетикалық көмек бойынша жаңа стандарттарды іске асыру саласындағы өзекті мәселелер талқыланып, ашық пікір алмасу алаңы жұмыс істеді.
“Конгресстің күн тәртібіне бірегей клиникалық жағдайларды талдау, халықаралық тәжірибе алмасу, сондай-ақ жүкті пациенттердің қатысуымен ұрықтың туа біткен ақауларын ультрадыбыстық диагностикалау бойынша шеберлік сыныбын өткізу кірді. Екі күндік іс-шараның қорытындысы бойынша бірауыздан қаулы, сондай-ақ осындай жиындарды тұрақты негізде өткізуді жоспарлау туралы шешім қабылданды, бұл пренаталды медицинаның одан әрі дамуына және осы маңызды салада тәжірибе алмасуға ықпал етеді. Біз конгрестен маңызды ақпарат алдық, әріптестерімізбен тәжірибе алмастық. Шетелдік ғалымдар дәрістер оқыды”, – дейді облыстық көпбейінді аурухана жанындағы перинаталдық орталық цитогенетигі Елена Хомякова.
Шарада біздің өңіріміз пренаталдық диагностикадан еліміз бойынша үздік бестікке енгені белгілі болды. Оның бір себебі – өңірде сәбилерде кездесетін туа біткен дерттерді ультрадыбыстық зерттеулердің жақсаруына байланысты 2,5 есеге азайған. Мәселен өткен тоғыз айда өңірде дүние есігін ашқан балалардың бірде-біріне орталық жүйке жүйесінің ақауы диагнозы қойылмаған. Дүниеге хромосомалық аурулар, мысалы, Даун, Эдвардс, Патау синдромы секілді ақаулары бар балалар сирек келетін болған. Өйткені бұл дерттер өте ерте кезеңде анықталады.
“Біз заманауи технологияларды енгізіп жатырмыз. Жүкті келіншектердің барлығына биохимиялық скрининг жүргізіледі. Нәтижесінде іштегі нәрестеде хромосомиялық ауытқушылықтың бар-жоғын білеміз. Тәуекел тобына жататындар анықталған жағдайда олармен әрі қарай жұмыс жүргізіледі, қосымша диагностикаға жіберіледі. Егер осыдан 10 жыл бұрын облыста Даун синдромы бар 12 бала дүниеге келсе, қазір олардың саны үштен аспайды”, – дейді Елена Хомякова.
Ақерке ДӘУРЕНБЕКҚЫЗЫ,
“Soltüstık Qazaqstan”.