Білікті маман – өндіріс тірегі

Soltüstık Казахстан

 Kyzylzhar_akparat@mail.ru

Өндірістің негізгі тірегі – білікті маман. Тәжірибесі мол, маманды­ғының қыр-сырына қаныққан жан­дар бар жерде жұмыс әрқашанда бе­рекелі. Петро­павл ауыр машина жасау зауы­тында да тәжірибелі мамандар мек­тебі қалыптасқан десек болады. Сол мектепте маман ретінде біліктілігін арттырып, тәжірибе жинаған Бағдат Жәнімбетов қазір өзінен кейінгілерге бар білгенін үйретіп жүр.

Бағдат Мұхамеджанұлы – Алма­ты қаласындағы Қ.Сәтпаев атындағы Қазақ ұлттық техникалық универ­ситетінің түлегі. Оқу орнын 1986 жылы тамамдаған ол елге оралған соң алған білімін өндіріс басында сынады.

– Жас маман ретінде өндіріске келгеннен бері 37 жыл өте шығыпты. Зауытта жұмыс істеген жылдары түрлі сәттерді бастан өткердік. Мен бұл зауытты “екінші үйім” дей­мін. Таңдаған кәсібім де, ұжымым да абыройымды асқақтатып, алға же­теледі. Бір кездері аға буын маған қалай көмектессе, мен де жастарға бағыт сілтеп, көрген-түйгенімді айтудан жалықпаймын, – дейді Бағдат Жәнімбетов.

Ғұмырының жартысын өндіріске арнаған ол Петропавл ауыр машина жасау зауытындағы еңбек жолын же­текші маман ретінде бастаған. Ал бү­гінде №2 дайындау цехы бастығының орынбасары. Зауыттың тоқтаусыз өнім өндіріп, табысқа жетуіне үлесін қосып жүрген кейіпкеріміз – нағыз еңбек адамына тән абырой иесі.

Ләзиза МЫРЗАНТАЙҚЫЗЫ,

“Soltüstık Qazaqstan”.